Суддзя Семянчук: "Бярэм ваду, валідол». У Берасці завяршыліся судовыя спрэчкі па справе " пудзілаў-рэек"

У судзе Ленінскага раёна Берасця 4 траўня працягнуўся разгляд крымінальнай справы за наўмыснае прывядзенне ў непрыдатнасць транспартнага сродку або шляхоў зносін (артыкул 309 Крымінальнага кодэксу), а таксама за развешванне пудзілаў у абласным цэнтры (ч. 2 артыкула 339 - хуліганства, здзйсненае групай асоб) і падпале аўтапакрышак.

Справу разглядае суддзя Аляксандр Семянчук.

Усяго па справе праходзяць дзесяць чалавек.

3 траўня пачаліся, а да вечара 4 траўня завяршыліся судовыя спрэчкі ў справе "пудзілаў-рэек". Пракуроры запыталі тэрміны аж да 5 гадоў, паведамляе тэлеграм-канал "Вясна/Брэст".

Да 5 гадоў калоніі: у Берасці працягваецца суд па блакаванні чыгункі і вывешванне пудзілаў

На стадыі судовых спрэчак абвінавачанне па ч. 3 арт. 339 КК было перакваліфікавана на ч. 2 арт. 339 (гэта значыць з "асабліва злоснага хуліганства" на "злоснае хуліганства"). Абвінавачванне паводле арт. 309 КК за замыканне рэек дротам засталося.

А перад пачаткам спрэчак суддзя Семянчук, абвясціўшы завяршэнне стадыі судовага следства, абвясціў слухачам: "Бярэм ваду, валідол".

Далей ён патлумачыў прысутным: судовыя спрэчкі складаюцца з рэплікі дзяржабвінавачання, затым ідзе рэпліка боку абароны. «Гэта мерапрыемства доўгае, з улікам колькасці ўдзельнікаў і аб'ему абвінавачвання». Бакі працэсу справіліся з спрэчкамі за паўтара дня, дзе паспелі выступіць адвакаты 10 абвінавачаных.

Сёння судовыя спрэчкі скончыліся. І абвінавачаныя выступілі з апошнім словам.

Прысуд па справе будзе абвешчаны 18 траўня ў 10:30.