“Апазналі па відэа”. Яшчэ аднаго пінчука ўзялі пад варту па справе аб масавых беспарадках
Праваабаронцам “Вясны” вядома, што пасля акцый пратэсту 9-10 жніўня каля Пінскага гарвыканкама былі заведзеныя крымінальныя справы аб масавых беспарадках мінімум на 11 чалавек, сярод іх — 27-гадовы пінчук Сяргей Ляжэнка, які яшчэ два з паловай тыдні таму быў на волі. Жонка Сяргея Вольга распавяла "Вясне" падрабязнасці гэтай справы.
- Сяргей Ляжэнка з сям'ёй. Фота прадастаўлена "Вясне" ягонай жонкай
Першы раз Сяргея Ляжэнку затрымалі 28 жніўня. Як распавяла яго жонка Вольга, супрацоўнікі міліцыі пазналі яго па адным відэа з пратэсту, якое з’явілася ў інтэрнэце. Тады яго затрымалі на 72 гадзіны і вызвалілі ў статусе падазраванага па ч. 2 арт. 293 Крымінальнага кодэкса (удзел у масавых беспарадках).
“Сяргея два разы затрымлівалі на ягонай працы на “Пінскдрэве”. Першы раз, калі яго затрымлівалі, выйшаў дырэктар і запытаўся ў супрацоўнікаў міліцыі, што адбываецца і куды яны вядуць іх рабочага. На што яны адказалі: “Да пайшоў ты нах**й”. Сяргей абурыўся, што яны нахамілі ягонаму начальніку. І на гэта яны сказалі, што ім усё роўна, хто гэта: “Хоць бог, хоць цар”, — распавяла Вольга.
30 жніўня ў дачыненні да Сяргея Ляжэнкі была прымененая мера стрымання ў выглядзе хатняга арышту. Але амаль праз месяц, 23 верасня, яго зноў затрымалі ў межах гэтай крымінальнай справы і змянілі меру стрымання на ўтрыманне пад вартай.
“Калі яго затрымлівалі, супрацоўнікі міліцыі паказальна яго вывелі з цэха, дзе ён працаваў”, — кажа жонка Сяргея.
- Вольга Ляжэнка каля СІЗА-6, куды прыехала перадаваць перадачу мужу. Фота: spring96.org
Па словах Вольгі Ляжэнкі падставай для змянення меры стрымання стала нібы парушэнне рэжыму хатняга арышту і меркаванне следства, што ў яе мужа ёсць намер з’ехаць за мяжу, што нібы падцверджваецца перапіскай у мясцовым чаце.
“Другая працоўная змена Сяргея сканчваецца ў 23 гадзіны. І ў супрацоўнікаў міліцыі ёсць працоўны расклад яго, яны ў курсе гэтага. Але яны прыйшлі з праверкай у палову адзіннаццатага. Гэта яны прызналі парушэннем рэжыму”, — распавяла Вольга.
Нягледзячы на тое, што ў Сяргея Ляжэнкі пяцігадовае дзіця, на ўтрыманне якога ён зарабляў на “Пінскдрэве”, яго змясцілі пад варту. 29 верасня яго перавялі ў СІЗА-6 у Баранавічах.
