Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Хроніка: Кароткатэрміновыя назіральнікі, якія ўдзельнічалі ў незалежным назіранні за парламенцкімі выбарамі ў межах кампаніі “Праваабаронцы за свабодныя выбары”, сустрэліся ў нефармальнай абстаноўцы, каб абмеркаваць свой досвед. Шведская дэлегацыя, якую ўзначальвала міністэрка замежных спраў Ан Ліндэ, правяла сустрэчу з беларускімі моладзевымі арганізацыямі, у якой паўдзельнічала і Валанцёрская служба “Вясны”. 25 лістапада адзначаецца Міжнародны дзень ліквідацыі гвалту ў дачыненні да жанчын.
Падзея: “Не нулявы адлік” — у Мінску прайшла сустрэча актывістак жаночага руху розных "хваляў" у Беларусі, пачынаючы з 1990-х. Арганізатаркі Яўгенія Іванова і Вольга Рахманава распавядуць, чым былі адметны жаночыя ініцыятывы на працягу іх амаль што трыццацігадовай гісторыі.
Каментар: “Маршыруй дзетка”— адна з самых маладых жаночых ініцытыўных груп у Беларусі, бо утварылася у адказ на жорсткую крытыку прэзідэнтам законапраекту аб хатнім гвалце (што было год таму). Каардынатарка ініцыятывы Святлана Гатальская адкажа, чаму ў іх пакуль што не атрымаўся марш і як гэта звязана з Законам аб масавых мерапрыемствах.
Каментар эксперта: З нагоды 30-годдзя Канвенцыі аб правах дзіцяці (што адзначалася 20 лістапада), паспрабуем адказаць на пытанне: з якімі бар’ерамі ў адукацыі сутыкаюцца беларускі дзеці з інваліднасцю? “Камісіі разглядаць дзіця не як асобу, а як цела з дэфектам”, — адзначае Аляксей Канстанцінаў з цэнтра “Леванія”.
Асоба: Арамаісу Міракяну прапанавалі быць зборшчыкам лазы, у той час як ён хацеў навучацца на журналіста. Усё таму, што ў хлопца другая група інваліднасці. Пра змушанасць змагання з МРЭКамі, стандарты якіх не мяняліся з савецкіх часоў, пра стэрэатыпы ў дачыненні да людзей з інваліднасцю і іх становішча – пра ўсё гэта Арамаіс распавядзе, абапіраючыся на свой уласны досвед.
У музычных паўзах – кампазіцыі ў выкананні .K (tochka K)
