Міліцыя сарвала сустрэчу з Пятром Рабавым у Гродна Дапоўнена
Пётр Рабаў. Ілюстрацыйнае фота
У Гродна ў "Цэнтр гарадскога жыцця" 9 кастрычніка на сустрэчу з расійскім гісторыкам, філосафам і даследчыкам анархізму Пятром Рабавым брутальна ўварваліся супрацоўнікі міліцыі.
Пад час сустрэчы была запланаваная лекцыя Пятра Рабава "Лібертарная сацыяльная думка апошняй траціны XX - пач. XXI cтст.". Па папярэдняй інфармацыі, міліцыя затрымала каля 20 чалавек, у тым ліку і лектара. Зараз вядома, што ўдзельнікаў мерапрыемства даставілі ў РУУС. У памяшканні "Цэнтра гарадскога жыцця" адбыўся ператрус.
- Міліцыя ў "Цэнтры гарадскога жыцця". Фота з сацсетак
Паведамляюць, што кожнага з затрыманых апытваць супрацоўнікі міліцыі.
Заўтра аналагічная лекцыя планавалася ў Баранавічах.
Пасля некалькіх гадзін утрымання ў пастарунку ўдзельнікаў мерапрыемства пачалі выпускаць. Вядома, што ўсяго было затрымана 16 чалавек, шэсць з іх адмовіліся здаваць адбіткі пальцаў, у тым ліку і Пётр Рабаў. У рэшце рэшт усіх затрыманых адпусцілі.
Падставай для затрымання стала "несанкцыянаванае масавае мерапрыемства". З памяшкання былі канфіскаваныя друкаваныя выданні.
Нагадаем, аналагічнае затрымання адбылося 27 жніўня у Баранавічах. Тады было затрымана 15 чалавек, якія прыйшлі на сустрэчу з былым палітвязнем Расіі, анархістам Аляксеем Сутугай. Моладзь даставілі ў ГАУС, дзе пратрымалі ад чатырох гадзін і болей. На трох грамадзян Расійскай Федэрацыі склалі пратаколы па арт. 17.11 КаАП – “Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці ці прапагандуе такую дзейнасць”. У іх адабралі аўтамабіль, усе тэлефоны, відэакамеру і нават паўэр-банк. З офісу, дзе адбывалася сустрэча, без складання пратаколаў вымання былі канфіскаваныя праектар, прынтар і кнігі.
