viasna on patreon

Па справе аб масавых беспарадках адпушчаны некалькі актывістаў "Маладога фронту"

2017 2017-04-01T18:08:00+0300 2017-04-03T13:14:42+0300 be https://spring96.org/files/images/sources/logo_mf.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

1 красавіка адпушчаны на свабоду затрыманыя раней у якасці падазраваных па крымінальнай справе аб падрыхтоўцы масавых беспарадкаў актывісты арганізацыі "Малады фронт" (зарэгістраваная ў Чэхіі) Дзмітрый Крамянецкі, Раман Васільеў, Арцём Леўчанка і Уладзімір Яроменак.

Пра гэта ў "Фэйсбуку" паведамляюць родныя і сябры актывістаў, перадае БелаПАН.

Усе адпушчаныя на свабоду былі затрыманыя ў якасці падазраваных па крымінальнай справе аб нібыта падрыхтоўцы масавых беспарадкаў і знаходзіліся ў СІЗА № 1 па вуліцы Валадарскага. Справу распачаў Камітэт дзяржаўнай бяспекі.

Як паведаміў Уладзімір Яроменак, яму змененая мера стрымання, аднак ён застаецца ў статусе падазраванага.

Паводле інфармацыі адвакатаў і блізкіх затрыманых, якая афіцыйна не пацверджана, абвінавачанні ў навучанні ці іншай падрыхтоўцы асоб для ўдзелу ў масавых беспарадках (ч. 3 арт. 293 Крымінальнага кодэкса) выставілі аднаму з лідараў "Маладога фронту" Дзмітрыю Дашкевічу і яшчэ як мінімум сямі затрыманым.

Затрыманні ў межах крымінальнай справы аб падрыхтоўцы масавых беспарадкаў пачаліся праз некалькі гадзін пасля заявы Аляксандра Лукашэнкі аб "баевіках, якія рыхтуюць правакацыю са зброяй", якую ён зрабіў 21 сакавіка падчас рабочай паездкі ў Магілёўскую вобласць.

Увечары 23 сакавіка дзяржаўныя тэлеканалы паведамілі, што ў рамках распачатай КДБ крымінальнай справы па факце навучання і падрыхтоўкі да ўдзелу ў масавых беспарадках затрымана 26 чалавек, праведзена 29 вобыскаў.

Пазней з неафіцыйных крыніц праваабаронцам стала вядома пра затрыманне яшчэ двух фігурантаў справы.

Многія з затрыманых — былыя члены патрыятычнай арганізацыі "Белы легіён", якая не існуе ўжо 15 гадоў, а таксама актывісты афіцыйна зарэгістраванага бабруйскага клуба "Патрыёт". У рамках гэтай крымінальнай справы таксама затрыманы шэраг актывістаў "Маладога фронту" на чале з Дзмітрыем Дашкевічам.

КДБ па-ранейшаму нічога не каментуе.

Апошнія навіны

Партнёрства

Сяброўства