viasna on patreon

Брэст: суд прызнаў дзве кнігі Зянона Пазняка экстрэмісцкай літаратурай

2016 2016-04-20T23:41:28+0300 2016-04-20T23:42:44+0300 be https://spring96.org/files/images/sources/pazniak-kniga-ekstremizm.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

Размова ідзе пра кнігі “Добрая фатаграфія” і “Абарона Курапатаў. Народны мемарыял”, а справа ў судзе Маскоўскага раёна Брэста разглядалася паводле заявы мясцовай мытні.

Менавіта брэсцкія мытнікі восенню мінулага года кафіскавалі асобнікі гэтых кніг у адказнага сакратара Кансерватыўна-Хрысціянскай партыі БНФ Алеся Чахольскага ў пункце мытнага афармлення “Брэст-Цэнтральны”, калі партыйны актывіст вяртаўся з Польшчы.

Кнігі былі накіраваны ў экспертную камісію Брэсцкай вобласці па ацэнцы інфармацыйнай прадукцыі наконт наяўнасці або адсутнасці ў ёй прыкмет экстрэмізму. Паводле высноваў камісіі, такія прыметы ў кнігах “Добрая фатаграфія” і “Абарона Курапатаў. Народны мемарыял” ёсць.

Алесь Чахольскі з такім рашэннем не пагадзіўся і выказаў недавер экспертызе, бо, як высветлілася, яе рабілі прадстаўнікі праўладнай грамадскай арганізацыі “Белая Русь”. Аднак суд Ленінскага раёна Брэста, дзе Чахольскі спрабаваў абскардзіць рашэнне экспертнай камісіі і дамагчыся вяртання кніг, прызнаў паседжанне экспертнай камісіі правамоцным і не ўбачыў падставаў для адмены канфіскацыі.

20 красавіка суддзя Маскоўскага раёна Брэста Таццяна Гаргадзе задаволіла заяву Брэсцкай мытні і прызнала кнігі “Добрая фатаграфія” і “Абарона Курапатаў. Народны мемарыял” экстрэмісцкай літаратурай. Алесь Чахольскі абвесціў пра намер абскардзіць і гэтае рашэнне.

Кніга “Добрая фатаграфія” з'яўляецца зборнікам фатаграфічных эсэ пра фотаздымкі з краін Еўропы і Амерыкі з сярэдзіны XIX стагоддзя і да нашых дзён. Кніга “Абарона Курапатаў. Народны мемарыял” (Зянон Пазняк напісаў яе разам з Валерыям Буйвалам) уяўляе сабой зборнік артыкулаў, успамінаў і фотаздымкаў, прысвечаных абароне месца масавага пахавання ахвяраў сталінскіх рэпрэсій.

Апошнія навіны

Партнёрства

Сяброўства