Праваабарончая праграма “Вясна” на Беларускім Радыё Рацыя
Кожны аўторак у 22:00 (паўтор у суботу ў 7:00) у эфіры незалежнай радыёстанцыі “Беларускае Радыё Рацыя” - праграма "Вясна", якая асвятляе падзеі, датычныя правоў чалавека на Беларусі.
Анонс выпуска:
“Хроніка”: Адбыўся суд над пастарам пратэстанцкай царквы «Праабражэнне» Сяргеем Нікалаенкам; Сябра БСДП (Грамада) Віталь Каліноўскі пакараны штрафам за распаўсюд улётак пра палітзняволеных;Еўрадэпутаты сустрэліся з лідарамі апазіцыйных партыяў у межах двухдзённага афіцыйнага візіту ў Беларусь.
"Каментар эксперта": Міліцыянты адабралі пашпарт у рэжысёркі Вольгі Нікалайчык яшчэ 26 траўня падчас затрымання за перфоманс “касметычка начных ваўкоў” каля расійскай амбасады. Тады Нікалайчык абвінавацілі ў брыдкаслоўі ды супраціўленні міліцыі і асудзілі да арышту на 13 сутак. Але па сёняшні дзень яе так і адправілі для адбыцця пакарання. Сітуацыю каментуе юрыст праваабарончага цэнтра "Вясна" Наста Лойка.
"Падзея": 16 чэрвеня каардынатары кампаніі незалежнага назірання “Праваабаронцы за свабодныя выбары” сустрэліся з прадстаўнікамі Бюро па дэмакратычных інстытутах і правах чалавека АБСЕ, якія знаходзіліся з двухдзённым афіцыйным візітам у Мінску. Адной з ключавых тэмаў сустрэчы былі прэзідэнцкія выбары, якія маюць адбыцца ў Беларусі ўвосень.
“Па-за межамі”: Беларускія валанцёры з “Праваабарончай гуманітарнай місіі ва Украіне” працягваюць сваю дзейнасць у складзе грамадскай дабрачыннай арганізацыі “Станцыя Харкаў”. Яны аказваюць самую разнастайную дапамогу перасяленцам з часова акупаванай тэрыторыі і раёнаў АТА: прымаюць, грузяць і размяркоўваюць гуманітарную дапамогу, працуюць на “гарачай лініі”, праводзяць анкетаванні ўцекачоў наконт эфектыўнасці працы мясцовай улады, сабесаў, займаюцца з дзецьмі часова перамешчаных асобаў. Пра надзённыя клопаты перасяленцаў і ўражанні беларускіх валанцёраў распавядае Алег Жлутка.
У музычных паўзах - кампазіцыі з новага альбома гурта Rahis.
