Бярозаўскія праваабаронцы плануюць пікет у Дзень Волі
Пікет прысвечаны не толькі адзначэнню 96-ых угодкаў абвяшчэння Беларускай Народнай Рэспублікі, кажа адзін з арганізатараў пікету праваабаронца Сяржук Русецкі, але і набалелым тэмам, пра якія трэба публічна гаварыць. Праваабаронца адзначае, што ўдзельнікі пікета збіраюцца выказаць пратэст супраць увядзення расійскіх войск на тэрыторыю незалежнай Украіны, а таксама супраць размяшчэння ваенных расійскіх баз на тэрыторыі нашай краіны. Сяргей Русецкі дадае, што нявырашанай застаецца і праблема палітвязняў, і пра гэта таксама будзе размова на масавым мерапрыемстве.
Бярозаўскія праваабаронцы звярнуліся ў адпаведныя органы за заключэннем дамоў на абслугоўванне масавага мерапрыемства.
Звычайна мясцовыя ўлады Бярозы адмаўляліся даваць дазволы на публічныя акцыі, матывуючы тым, што арганізатары не мелі заключаных дамоў з бальніцай, міліцыяй або ЖКГ. Аднак у снежні мінулага года праваабаронцы атрымалі адказ з райвыканкама на свае скаргі наконт немагчымасці заключыць дамовы. У адказе намеснік старшыні райвыканкама Яўген Тарасюк паведаміў, што пытанні па дамовах урэгуляваны, і яны будуць заключацца.
