Мікола Уласевіч падаў заяўку на пікет у падтрымку Майдана
Фота Westki.info
Грамадскі актывіст з мястэчка Варняны Мікола Уласевіч падаў заяўку ў Астравецкі райвыканкам на правядзенне ў раённым цэнтры інфармацыйнага пікету. Заяўка пададзена на 21 снежня. Мікола Уласевіч намераны выказаць сваю салідарнасць з украінскім народам у яго памкненні жыць у Еўразвязе.
Акрамя гэтага Уласевіч працягвае змагацца з мясцовай “вертыкаллю” за канстытуцыйнае права праводзіць пікеты на актуальную тэматыку. 12 снежня ён падаў скаргу ў суд Астравецкага раёну на рашэнне выканкаму. Напомнім, што грамадскі актывіст падаваў заяўку на пікет 7 снежня пад назвай “Карупцыянераў да адказнасці”. У выніку Уласевіч атрымаў адмову, якая была падпісаная першым намеснікам старшыні Астравецкага райвыканкаму Андрэем Янчэўскім. Зараз Мікалай Уласевіч просіць суд пачаць грамадзянскую справу і прызнаць рашэнне чыноўнікаў незаконным.
