На добраўпарадкаванне паркаў ў Баранавічах грошай няма

Так адказала 150 грамадзянам Баранавіч Брэсцкая абласная ўлада на іх пісьмо ў Адміністрацыю прэзідэнта.

Ужо некалькі гадоў жыхары Баранавічаў  накіроўваюць скаргі ў розныя інстанцыі на тое, што ў двух гарадскіх парках няма як адпачываць: яны недабраўпарадкаваныя і не маюць нават прыбіральняў.

Праўда, улады крыху абнадзеілі ў апошнім адказе, што прыбіральня ў адным з паркаў з’явіцца ў канцы траўня. Крыху раней паставілі два дзіцячыя атракцыёны. На гэтым улада, як сведчыць апошні адказ, паставіла крыж: няма сродкаў. 

“Такі адказ проста шакуе, - паведамляе  арганізатар гэтай кампаніі грамадскі актывіст Рыгор Грык,  - калі сапраўды што трэба людзям – заўсёды няма грошай. А куды яны дзяваюцца? Людзі ж працуюць, сплочваюць падаткі, а грошай усё няма і няма. На дажынкі ці лядовыя палацы – калі ласка”.

Пад заявамі наконт добраўпарадкавання паркаў было сабрана агулам 500 подпісаў. А вынік, можна сказаць, нулявы.