У Салігорску працягнецца знішчэнне лесапаркавай зоны
Актывістам кампаніі “Абаронім лес” стала вядома пра чарговыя планы ўладаў па высечцы салігорскай лесапаркавай зоны. Гэтым разам катэгарыйны лес стане ахвярай будаўніцтва кафэ-бару з прылеглай інфраструктурай агульнай плошчай больш за адзін гектар.
Паводле ўжо распрацаванага праекту пад будаўніцтва аб’екту ўладамі вызначаны кавалак лесапарку на выездзе з Салігорску ў бок вёсцы Тычыны. Праект так і завецца “Кафэ-бар у вёсцы Тычыны Салігорскага раёна”, хоць да вёскі больш за кіламетар, а да новага мікрараёна сталіцы шахцёраў літаральна метраў сто.
- Найбольш абуральным у дадзеным выпадку з’яўляецца той факт, што праект ужо распрацаваны і ўзгоднены ўладамі, але аніякага грамадскага абмеркавання не было. - кажа актывіст кампаніі “Абаронім лес” Уладзімір Шыла. - Нават калі мы даб’емся правядзення такога абмеркавання, пры наяўнасці ўжо зацьвердажанага будаўнічага праекту шанцаў нешта змяніць вельмі мала.
Практычна ўвесь салігорскі лесапарк адносіцца да першай катэгорыі ахоўнасці, а значыць рэалізацыю любога праекту, звязанага з высечкай лесу, неабходна пачынаць з грамадскага абмеркавання, лічыць Уладзімір Шыла і адразу прапануе альтэрнатыўны варыянт згаданага праекту:
- Літаральна ў паўкіламетры ад абаранага месца ў бок вёскі Тычыны побач з лесам ёсць невялічкае поле. Рэалізаваць праект можна было б на тым ўзлеску. Гэткі варыянт дазволіў бы абыйсціся высечкай мінімальнай колькасці дрэваў ды, прынамсі, больш адпавядаў бы сваёй назве, паводле якой кафэ-бар мусіць знаходзіцца ў Тычынах.
Агулам абаронцы салігорскага лесу называюць склаўшуюся сітуацыю наўпрост жахлівай. Вядома, што Салігорск з’яўляецца не толькі лідэрам па шчыльнасці насельніцтва ў Беларусі, але ўваходзіць у пяцёрку самых шчыльнанаселеных гарадоў свету. Пры гэтым ў стотысячным горадзе зарэгістравана паўсотні тысяч аўтамабіляў, што самым сур’ёзным чынам ўплывае на экалогію. Да таго ж сталіцу гарнякоў атачае буйная прамысловасць, а адкіды солездабычы “Беларуськалія” утвараюць гіганцкія тэрыконы. У сакавіку 2013 год побач з Салігорскам з’явіцца буйны хімічны завод па вытворчасці складаных угнаенняў, які ўжо называюць экалагічнай катастрофай раёна. У такіх абставінах высечку дрэваў ў горадзе актывісты кампаніі “Абаронім лес” называюць наўпрост злачынствам, за якое мусіць прадугледжвацца крымінальная адказнасць.
