Дэпутаты не лічаць мэтазгоднымі змены ў закон пра абыходжанне з жывёламі
Такі па сутнасці адказ на свой зварот у Палату прадстаўнікоў атрымала брэсцкая абаронца жывёлаў Ірына Сіняпкіна. Актывістка дамагалася, каб беларускі парламент перагледзеў норму, згодна з якой у кватэрах дазваляецца трымаць не больш за двух прадстаўнікоў жывёльнага свету.
З адказу вынікае, што гэтае пытанне разглядалася на паседжанні пастаяннай камісіі Палаты прадстаўнікоў па праблемах катастрофы на Чарнобыльскай АЭС, экалогіі і прыродакарыстання, аднак дэпутаты дзеючага парламента не збіраюцца прапаноўваць змены ў заканадаўства.
Па словах Ірыны Сіняпкінай, абаронцы правоў жывёлаў рэгулярна, пачынаючы з 2003 года, дасылаюць звароты дэпутатам, каб тыя прыслухаліся да прапановаў і не ўводзілі неабгрунтаваныя абмежаванні, ад якіх церпяць хатнія жывёлы. Але пакуль, лічыць Сіняпкіна, парламентам прымаюцца рашэнні, несумяшчальныя з нормамі маралі.
