Рок-салідарнасць з Кулінковічам
«Нейра Дзюбель» за актыўную грамадзянскую пазіцыю трапіў у «чорныя спісы»
Грамадская кампанія «Рок-салідарнасць» запрашае 6 красавіка на творчую сустрэчу з лідэрам гурта «Нейра Дзюбель» Аляксандрам Кулінковічам.
Сустрэча пройдзе ў офісе БНФ па адрасе Менск, ул.Чарнышэўскага, 3.
У праграме - прэзентацыя кампаніі «Рок-салідарнасць», адказы на пытанні, конкурсы, дыскусія аб актуальных праблемах беларускай рок-музыкі, а таксама невялікі акустычны выступ і шмат іншага і цікавага! Уваход вольны! Пачатак 19:00.
Гурт «Нейра Дзюбель» - адзін з найбольш вядомых і папулярных беларускіх рок-гуртоў.
Ён з'яўляецца ўдзельнікам знакавых фестываляў: «Be Free» (Будзь вольным!), «Басовішча», «Рок-каранацыя», «Рок па вакацыях» і інш. За актыўную грамадзянскую пазіцыю гурт разам з іншымі гуртамі трапіў у так званыя «чорныя спісы».
За апошнія месяцы былі адмененыя ўсе запланаваныя канцэрты гурта.
«Рок-салідарнасць» - грамадская кампанія ў падтрымку рок-музыкаў, якія трапілі ў чорны спіс, створаная актывістамі грамадскіх арганізацый і аматарамі айчыннай рок-музыкі, распачалася 10 снежня 2011 года, у Дзень абароны правоў чалавека. Кампанія стартавала ў Менску і на сёння закранула Магілёў, Наваполацк, Віцебск і іншыя гарады краіны.
