Адміністрацыя Полацкага ўніверсітэту пагражае Кацярыне Салаўёвай выключэньнем
Сёньня адбылося паседжаньне дысцыплінарнай камісіі Полацкага дзяржаўнага ўніверсітэту, на якім было прынятае рашэньне аб немэтазгоднасьці далейшага навучаньня моладзевай актывісткі Кацярыны Салаўёвай.
На гэтым тыдні дзяўчына была затрыманая нібыта за нанясеньне палітычных графіці “Нас не спыніць!”, “Жыве Беларусь!” і іншых, у інтэрнацкім пакоі актывісткі быў праведзены вобшук, канфіскаваныя матэрыялы, датычныя "Маладога Фронту". Па выніках обшуку будзе адбывацца праверка пракуратуры, магчыма ўзбуджэньне крымінальнай справы па арт. 193.1 КК РБ, таксама супрацоўнікі праваахоўных органаў пагражалі дзяўчыне крымінальнай справай за зьняты з полацкай пракуратуры некім і спалены дзяржаўны чырвона-зялёны сьцяг.
Большасьць сяброў дысцыплінарнай камісіі, у якую ўваходзіць кіраўніцтва Полацкага дзяржуніверсітэту, выказалася аб немэтазгоднасьці далейшага навучання ў ВНУ палітычна актыўнай студэнткі. Ёй прапанавалі самой забраць дакументы з навучальнай установы.
