Дайджэст вызваленых: мінімум 24 палітвязні ў лютым выйшлі на волю па заканчэнні тэрміну

На дадзены момант у Беларусі налічваецца 1414 палітвязняў, а колькасць іх павялічваецца амаль штотыднёва. Пры гэтым кожны месяц некалькі дзясяткаў палітвязняў выходзяць з месцаў зняволення або па заканчэнні тэрміну, або пасля суда да накіравання ў папраўчую ўстанову адкрытага тыпу (на "хімію"), ці пачатку адбыцця тэрміну на "хатняй хіміі". Па данных "Вясны", у лютым на волю выйшлі мінімум 24 чалавек, якія цалкам адбылі свае тэрміны, а чацвёра з іх правялі за кратамі больш за тры гады. Яшчэ тры чалавекі былі асуджаныя да "хатняй хіміі" і вызваленыя з СІЗА. За што палітвязні адбывалі тэрміны і колькі іх утрымлівалі ў месцах няволі — распавядае "Вясна" ў штомесячным дайджэсце. 

Палітвязень Максім Сяргеенка — 2 гады, 10 месяцаў і 10 дзён у зняволенні

Максім — кіроўца хуткай дапамогі з Магілёва. Яго асудзілі за "павешаных" лялек з асобамі чыноўнікаў паводле ч. 2 арт. 339 КК (Хуліганства, здзейсненае групай асобаў) і па арт. 368 КК (Абраза прэзідэнта). У красавіку 2021 года Сяргеенку прызначылі тры гады калоніі агульнага рэжыму.

Свой тэрмін мужчына адбываў тэрмін у наваполацкай калоніі. 29 лютага Максім выйшаў на волю, цалкам адбыўшы тэрмін, піша "MAYDAYMog".

У студзені падчас рэйду КДБ на знаёмых і сваякоў палітвязняў, а таксама былых палітзняволеных, затрымалі жонку Максіма — Алесю. Цяпер жанчына знаходзіцца ў СІЗА ў межах крымінальнай справы. У сям'і двое дзяцей 3 і 16 гадоў.

Палітвязень Уладзімір Гарбавец — 1 год, 11 месяцаў і 25 дзён у зняволенні

Уладзімір — фігурант крымінальнай "справы карагодаў", узбуджанай пасля акцыі пратэсту ў Брэсце 13 верасня 2020 года паводле арт. 342 Крымінальнага кодэксу. Яго асудзілі да двух гадоў абмежавання волі з накіраваннем у ПУАТ ("хімія"). 

З 4 сакавіка 2022 года Уладзімір адбываў тэрмін у ПУАТ № 43. Па інфармацыі "Берасцейскай Вясны", палітвязень выйшаў на волю 22 лютага.

Палітвязень Павел Пяскоў — 3 гады, 5 месяцаў і 10 дзён у зняволенні 

Павел — першы, хто атрымаў палітычны прысуд за падзеі пасля выбараў 2020 года. Яго абвінавацілі ў супраціве супрацоўніку органаў унутраных спраў, звязаным з ужываннем гвалту (ч. 2 арт. 363 КК) на акцыі 19 чэрвеня 2020 года ў Маладзечна, на якой амапавец дастаў пісталет. Паўлу прысудзілі тры гады і тры месяцы калоніі.

Пазней яго асудзілі да яшчэ аднаго году зняволення за «злоснае непадпарадкаванне патрабаванням адміністрацыі калоніі».

Палітвязень Яўген Зялкоўскі — 3 гады, 2 месяцы і 27 дзён у зняволенні 

Жыхара Гомеля асудзілі 18 траўня 2021 года на тры гады і шэсць месяцаў калоніі агульнага рэжыму за "злоснае хуліганства" (ч. 2 арт. 339 Крымінальнага кодэксу). На судзе ён распавядаў пра катаванні з боку міліцыі.

Паводле следства, Зялкоўскі двойчы ўсталёўваў у пустынных месцах Гомеля бел-чырвона-белыя сцягі з петардай і карыкатурай на АМАП. Яўген Зялкоўскі віну ў асабліва злосным хуліганстве не прызнаў. «Інсталяцыі» з бел-чырвона-белым сцягам ён рабіў і размяшчаў у пустынных месцах ноччу.

Тэрмін палітвязень адбываў у віцебскай калоніі № 3. 

Палітзняволеная Вольга Клімкова — 3 гады, 2 месяцы і 9 дзён у зняволенні

Вольгу затрымалі ў Магілёве 24 лістапада 2020 года. У аўтамабілі жанчыны знайшлі больш за 800 асобнікаў незарэгістраванай газеты "Могилевские вести".

Жанчыну прызналі вінаватай па ч. 2 арт. 339 КК (хуліганства, здзейсненае групай асобаў) і па арт. 368 КК (абраза Лукашэнкі). Вольгу, а таксама Максіма Сяргеенку і Сяргея Скока абвінавацілі ў тым, што яны вырабілі шэсць роставых лялек "з цынічнымі надпісамі і выявамі вышэйшых службовых асоб", размясцілі іх на пуцеправодах паблізу вёсак Вільчыцы і Любуж, сфатаграфавалі і распаўсюдзілі здымкі ў сеціве. 

19 красавіка 2021 суд прызначыў Клімковай 3,5 гады калоніі агульнага рэжыму. Адбывала пакаранне ў ПК № 4, адкуль выйшла на волю 4 лютага. 

Палітвязень Міхаіл Феранец — 3 гады, 4 месяцы і 18 дзён у зняволенні 

20 верасня 2021 года ў судзе Заводскага раёна Мінска палітзняволенага грамадзяніна Украіны асудзілі да трох гадоў калоніі. Феранца абвінавацілі ва ўдзеле ў трох Маршах у 2020 годзе, а таксама ў арганізацыі шляхам адміністравання тг-канала "Смелыя людзі", нанясення пратэсных надпісаў і малюнкаў, вывешвання БЧБ-стужак у дварах Фрунзенскага раёна Мінска.

Выхадца з Данецка, які ў Беларусі жыў больш за дзесяць гадоў, затрымалі 16 верасня 2020 года, 7 месяцаў яго трымалі як замежніка ў чаканні высылкі з краіны ў ІЧУ на Акрэсціна. Пры гэтым у тэрмін пакарання сямімесячнае ўтрыманне яму не залічылі. Ён выступіў з моцным апошнім словам, у якім распавёў пра псіхалагічны і фізічны гвалт з боку сілавікоў.

Міхаіл быў вызвалены па заканчэнні тэрміну пакарання 16 снежня 2023 года і адразу ж затрыманы і змешчаны ў ІЧУ ў Магілёве. 1 лютага 2024 года палітвязень выйшаў на волю, але адразу быў дэпартаваны з Беларусі. 

Трое палітзняволеных выйшлі на волю пасля суда

У лютым беларускія суды ў абсалютнай большасці прызначалі палітвязням пазбаўленне волі. Толькі тры чалавекі ў мінулым месяцы выйшлі на волю з СІЗА пасля суда — ім прызначылі "хатнюю хімію". Але гэтыя дадзеныя могуць быць няпоўныя, бо не ўсе вынікі судоў над палітвязнямі пакуль вядомыя праваабаронцам. Гэта:

• Ганне Крук — тры гады "хатняй хіміі";
• Мікалаю Шляжко — два з паловай гады "хатняй хіміі";
• Іне Шляжко — два з паловай гады "хатняй хіміі".