#FreeViasna: Агляд навінаў пра зняволеных праваабаронцаў "Вясны"
Сабралі навіны пра вясноўцаў, што знаходзяцца за кратамі.
У Осла адбудзецца Нобелеўская канферэнцыя міру
"Нобелеўская канферэнцыя міру 2023 адзначае дасягненні праваабаронцаў, вызначае рызыкі, з якімі яны сутыкаюцца, і заклікае да дзеянняў у падтрымку іх працы", — паведамляе Nobel Peace Centr.
Канферэнцыя адбудзецца ў Осла, у Нацыянальным музеі. Прыняць удзел у ёй можна і анлайн. У канферэнцыі прамуць удзел лаўрэаты Нобелеўскай прэміі міру Аляксандра Матвійчук (Цэнтр грамадзянскіх свабод), Ян Рачынскі (ПЦ "Мемарыял"), а таксама Наталля Пінчук, жонка лаўрэата Нобелеўскай прэміі міру і старшыні ПЦ "Вясна" Алеся Бяляцкага.
Падчас канферэнцыі будзе прэзентаваная "Сланечнікавая дэкларацыя". Дэкларацыя была створаная Нобелеўскім цэнтрам міру разам з лаўрэатамі Нобелеўскай прэміі міру 2022 года — прадстаўнікамі ПЦ "Вясна" (ад імя Алеся Бяляцкага), ПЦ "Мемарыял" і Цэнтра грамадзянскіх свабодаў.
"Сланечнікавая дэкларацыя" — гэта набор канкрэтных рэкамендацый, накіраваных на паляпшэнне абароны праваабаронцаў і прасторы, у якой яны працуюць. Дэкларацыя закліканая прыцягнуць дадатковую ўвагу свету да Нобелеўскай прэмію міру, каб спрыяць павелічэнню павагі і падтрымкі мірнай працы праваабаронцаў.
Малюнкі Марфы Рабковай і Валянціна Стэфановіча, якія яны даслалі з-за кратаў, з'явіліся анлайн
На сайце PrisonArt з'явіліся малюнкі палітзняволеных праваабаронцаў Марфы Рабковай (можна паглядзець тут) і Валянціна Стэфановіча (можна паглядзець тут).
Валянцін Стэфановіч маляваў катоў, сярод іх ёсць нават і "KISS-UN-BAND":
Адзін з малюнкаў Марфы Рабковай — пра бусла:
Сімвалічная "хросная" і 100 дэпутатаў Бундэстага накіравалі адкрыты зварот да ўладаў Беларусі
Агнешка Бругер, намесніца старшыні фракцыі партыі “Саюз 90/Зялёныя” ў нямецкім Бундэстагу і сімвалічная “хросная” палітзняволенай праваабаронцы “Вясны” Марфы Рабковай у межах кампаніі #WeStandBYou, накіравала адкрыты зварот да беларускіх уладаў. 100 дэпутатаў з нямецкага парламенту падтрымалі зварот і падпісаліся пад ім.
Агнешка Бругер звяртае ўвагу на несправядлівы прысуд у 14 гадоў і 9 месяцаў для Марфы Рабковай за працу ў “Вясне” ў якасці каардынатаркі валанцёраў, а таксама за дакументаванне фактаў катаванняў і жорсткага абыходжання з боку сілавікоў у дачыненні да мірных дэманстрантаў у Беларусі.
“Мы салідарныя з Марфай Рабковай”.
За апошні час не было ніякіх навінаў пра палітзняволенага праваабаронцу Уладзіміра Лабковіча.
Падтрымайце лістамі і паштоўкамі салідарнасці зняволеных вясноўцаў:ПК № 9, 213410, г. Горкі, вул. Дабралюбава, 16 ПК № 15, 213105, г. Магілёў, п/а Вейна, Слаўгарадская шаша, 183 ПК № 17, 213004, г. Шклоў, вул. 1-я Заводская, 8 |
За апошні чам не было ніякіх навінаў пра валанцёра Андрэя Чапюка
Дасылайце лісты ці паштоўкі салідарнасці Марфе і Андрэю:ПК № 4. 246035, г. Гомель, вул. Антошкіна, 3 ПК № 22. 225295, Брэсцкая вобласць, г. Івацэвічы, ст. Даманава, а/с 20 |
Як яшчэ падтрымаць "вясноўцаў"?
1. Лісты салідарнасці – наймацнейшая падтрымка звонку. Падпісвайце паштоўкі, пішыце лісты і дасылайце словы падтрымкі нашым калегам. Адпраўляць лісты можна праз звычайную пошту, а таксама праз электронныя сэрвісы:
Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце пакідаць сваё імя ў тэксце тэлеграмы.
2. Не менш значная падтрымка – распаўсюд інфармацыі. Мы заклікаем распавядаць пра “вясноўцаў” і іншых палітзняволеных блізкім, сябрам, калегам ды наўпрост у сацыяльных сетках. Так найбольшая колькасць людзей зможа даведацца пра гісторыі зняволеных і праявіць сваю салідарнасць з імі! Абавязкова выкарыстоўвайце хэштэг #FreeViasna.
3. Падпішыце петыцыю за вызваленне “вясноўцаў” і ўсіх палітвязняў Беларусі!
4. Падтрымаць "Вясну" на Patreon ці аднаразовым данатам.
Больш навінаў пра вясноўцаў – на сайце freeviasna.org
