"Схаваная экстрадыцыя". Беларуса выдварылі з Расіі ў Беларусь, дзе яму пагражае крымінальны пераслед
Праваабаронцам стала вядома, што 45-гадовага беларуса Дзяніса Хахлова выдварылі з Расіі ў Беларусь. Яго даставілі ў ізалятар часовага ўтрымання горада Круглае (Магілёўская вобласць). Сёння яго павінны перавесці ў СІЗА. На радзіме яму пагражае палітычна матываваны крымінальны пераслед паводле часткі 1 артыкула 342 Крымінальнага кодэкса Беларусі (арганізацыя групавых дзеянняў, якія груба парушаюць грамадскі парадак і спалучаных з відавочным непадпарадкаваннем законным патрабаванням прадстаўнікоў улады або пацягнулі парушэнне працы транспарту) за ўдзел у мірным мітынгу.
Раней паведамлялася, што ў дачыненні да Дзяніса Хахлова ўжо была спыненая экстрадыцыя з Расіі. 11 чэрвеня 2023 года Хахлова затрымалі ў Расіі сувязі з яго знаходжаннем у міжнародным вышуку, аднак ужо 13 чэрвеня экстрадыцыйная праверка завяршылася спыненнем экстрадыцыйных працэдур. Тым не менш, яго не вызвалілі. Хахлова павезлі ў Зольскі раённы суд, дзе яму паведамілі, што на яго склалі адміністрацыйны пратакол за перавышэнне гранічнага тэрміну знаходжання ў Расіі без рэгістрацыі на 1 месяц і 8 дзён. Суд прызначыў Хахлову адміністрацыйнае пакаранне ў выглядзе адміністрацыйнага выдварэння ў Беларусь. Адвакат Султан Тэльхігаў палічыў, што дадзенай высылкай фактычна была падмененая экстрадыцыя.
![]()
Беларуса наўпрост цяпер выдвараюць з Расіі ў Беларусь. Там яго чакае крымінальны пераслед за пратэсты
Раней адвакат Султан Тэльхігаў звяртаўся да Упаўнаважанага па правах чалавека ў Расійскай Федэрацыі Таццяны Маскальковай з просьбай зрабіць усё, што ад яе залежыць, каб прадухіліць выдачу Хахлова ў Беларусь і гарантаваць магчымасці яго выезду ў трэцюю краіну. Таксама абарона Хахлова абскардзіла пастанову суда аб прызначэнні адміністрацыйнага пакарання ў выглядзе выдварэння, "абгрунтавана паказваючы на існыя рызыкі палітычна матываванага пераследу ў Беларусі, адсутнасць доступу да справядлівага судовага разбору, а таксама рызыку катаванняў, жорсткага і бесчалавечнага абыходжання".
Акрамя таго, адвакат Султан Тэльхігаў звяртаўся да Спецыяльнага дакладчыка ААН па сітуацыі з правамі чалавека ў Беларусі і Спецыяльнага дакладчыка па свабодзе сходаў, і прасіў іх звярнуць увагу на гэтыя рызыкі і на тое, што выдварэнне не можа падмяняць сабой строгую працэдуру экстрадыцыі, у якой раней было адмоўлена, і што Расія адмаўляе ў арганізацыі выдварэння ў іншую краіну за свой кошт, хоць не павінна мець прынцыповай цікавасці ў тым, куды Хахлоў выедзе. У адрас урада Расійскай Федэрацыі Спецдакладчыкі накіравалі ліст 26 ліпеня 2023 года.
"Я мяркую, што такое выдварэнне з'яўляецца схаванай формай экстрадыцыі, якая не адпавядае міжнародным гарантыям правоў чалавека", — мяркуе Султан Тэльхігаў.
Калі вы ці вашы блізкія і знаёмыя беларусы апынуліся ў падобнай сітуацыі ў Расіі (пад пагрозай экстрадыцыі, выдварэння або высылкі ў Беларусь), звяртайцеся да праваабаронцаў Маскоўскай Хельсінкскай групы праз e-mail: mhg@mhg.ru.
![]()
Экстрадыцыя, выдварэнне, выкраданне. Як беларусаў вывозяць з Расіі, каб асудзіць на радзіме?