Новыя факты пераследу беларусаў і беларусак 20 чэрвеня

У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі і экстрэмісцкімі фармаваннямі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 20 чэрвеня збірае факты палітычнага пераследу беларусаў і беларусак – інфармацыя ўвесь час дапаўняецца.

Верхнядзвінскую актывістку Валянціну Болбат зноў арыштавалі на 30 сутак. Яна пакуль на волі

Валянціну затрымалі 30 красавіка, але пасля гэтага жанчыне стала дрэнна, таму яна на некаторы час трапіла ў бальніцу. Суд адбыўся 10 траўня ў судзе Верхнядзвінскага раёна. Жанчыне тады прызначылі 30 сутак арышту паводле арт. 19.11 КаАП (распаўсюд экстрэмісцкіх матэрыялаў) і арт. 24.23 КаАП (несанкцыянаванае пікетаванне).

Паводле "Віцебскай Вясны", пасля суда з жанчынай здарыўся гіпертанічны крыз, і яе адвезлі ў лякарню, дзе яна лячылася два тыдні. Валянціна абскардзіла пастанову суда ў Віцебскім абласным судзе. 22 траўня суддзя Святлана Іванова адмяніла рашэнне суда Верхнядзвінскага раёна. Таму справу перадалі ўжо ў Наваполацкі суд.

Сёння адбыўся чарговы суд над актывісткай. Суддзя Зінаіда Балаболава прызначыла жанчыне зноў 30 сутак. Валянціна пакуль на волі і плануе абскардзіць пастанову суда.

Сайт Светлагорскага тэлеканала "Ранак" перастаў адкрывацца як у Беларусі, так і за яе межамі

Нагадаем, 11 чэрвеня ў Светлагорску былі затрыманыя восем супрацоўнікаў тэлеканалу «Ранак». Сапраўднай прычынай для затрымання мог стаць сюжэт пра выбух на Светлагорскім ЦКК, у якім загінула тры чалавекі.

На ўсіх затрыманых склалі пратаколы па ч. 2 арт. 19.11 КаАП. Мужчынам прысудзілі па 7 сутак адміністрацыйнага арышту, жанчынам — штрафы ў памеры 25 б. в.

Супраць магілёўскага прадпрымальніка, якога затрымалі за ўкраінскі і нацыянальны сцяг у салоне аўтамабіля, распачалі крымінальную справу

Гаворка пра бізнесоўца Уладзіміра Тычынскага. У прапагандысцкім сюжэце рэгіянальнага магілёўскага каналу «Беларусь 4» сказалі, што мужчына «быў прыхільнікам укро-нацысцкіх фармаванняў», а таксама «ездзіў з украінскай нацыяналістычнай сімволікай у сваім аўто». Пад апошнім маецца на ўвазе афіцыйны сцяг Украіны. Пазней Уладзіміра арыштавалі на 15 сутак.

Як піша @MAYDAYMog, , пакуль Тычынскі знаходзіўся ў ІЧУ, на яго «накапалі» падставы для ўзбуджэння крымінальнай справы.

53-гадовага мужчыну абвінавацілі ў тым, што ў красавіку мінулага года ён зняў на свой мабільны тэлефон перамяшчэнне расійскай вайсковай тэхнікі і адправіў відэа «экстрэмісцкаму» медыя. Цяпер Тычынскі знаходзіцца ў следчым ізалятары Магілёва.

Палітзняволенага Паўла Севярынца збіраюцца пераводзіць на турэмны рэжым

Палітык, сузаснавальнік партыі Беларуская Хрысціянская Дэмакратыя і пісьменнік больш за тры гады ўтрымліваецца ў зняволенні.

У траўні 2021 яму і яшчэ шасці палітвязням прысудзілі ад чатырох да сямі гадоў калоніі. Суд праходзіў у закрытым рэжыме.

У красавіку адміністарцыя папраўчай калоніі № 17 прызнала Паўла «злосным парушальнікам рэжыму». Тады яму скарацілі дазволеную колькасць званкоў дадому і грашовых пераводаў. А потым яго пазбавілі і працяглага спаткання.

Цяпер стала вядома, што 21 чэрвеня ў Шклове адбудзецца суд па замене Севярэнцу рэжыму ўтрымання і пераводзе ў іншую папраўчую ўстанову. Меркавана, яго хочуць перавесці на турэмны рэжым. Рашэнне будзе прымаць суддзя Аляксандр Тараканаў.