Бацьку і дачку пакаралі "хатняй хіміяй" за ўдзел у акцыі пратэсту ў 2020 годзе
Акцыя пратэсту ў Мінску ў 2020 годзе. Ілюстрацыйнае фота
У судзе Савецкага раёна Мінска 5 красавіка асудзілі 60-гадовага Юрыя Машка і ягоную 24-гадовую дачку Валерыю Машок. Іх абвінавацілі ў арганізацыі і падрыхтоўцы дзеянняў, якія груба парушаюць грамадскі парадак, альбо актыўным ўдзеле ў іх (ч. 1 арт. 342 Крымінальнага кодэкса).
Справу разглядаў суддзя Аляксандр Якунчыхін.
Паводле матэрыялаў справы, бацька разам з дачкой восенню 2020 года, знаходзячыся на тэрыторыі Мінска на праезнай частцы праспекта Пераможцаў, дзейнічаючы групай асоб, і з іншымі асобамі, "прынялі актыўны ўдзел у групавых дзеяннях, якія груба парушаюць грамадскі парадак і спалучаных з відавочным непадпарадкаваннем законным патрабаванням супрацоўнікаў міліцыі, парушалі працу транспарту і прадпрыемстваў, блакавалі і заступалі шлях транспартным сродкам, у тым ліку гарадскога пасажырскага транспарту."
Іх вылічылі па фатаздымках з месца падзей.
Юрый і Валерыя Машок 27 красавіка былі ўнесеныя ў спіс Асоб, датычных да экстрэмісцкай дзейнасці.
Суд прызнаў іх вінаватымі і пакараў абмежаваннем волі без накіравання ў папраўчую ўстанову адкрытага тыпу на тэрмін два гады кожнага.
Мера стрымання ў выглядзе змяшчэння вад варту змененая на падпіску аб нявыездзе.
