Новыя затрыманні, абнаўленне "тэрарыстычнага спіса": хроніка пераследу 2 лютага

У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць экстрэмісцкімі матэрыяламі. Адбываюцца рэпрэсіі ў дачыненні да грамадзян, якія актыўна выказваюць сваю пазіцыю ў адносінах да вайны, распачатай узброенымі сіламі Расіі. Праваабарончы цэнтр "Вясна" 2 лютага 2023 года збірае факты палітычнага пераследу беларусаў – інфармацыя ўвесь час дапаўняецца.

ГУБАЗіК затрымаў адміністратара тэлеграм-канала "Па-беларуску"

Як паведамляе "Наша Ніва", затрыманага зваць Андрэй Філіпчык. 

«Пакаяльнае відэа» з ім з'явілася ў праўладным тг-канале. У ім хлопец кажа, што ўдзельнічаў «у несанкцыянаваных масавых мерапрыемстваў не меней за пяць разоў». Ён працуе ў ААТ «Люксофт» праграмістам. Сілавікі прымусілі яго назваць свой заробак.

У затрыманага дома знайшлі нацыянальны сцяг, герб Пагоня і іншыя рэчы з нацыянальнай сімволікай. Сілавікі асобна адзначылі, што хлопец уладальнік карты паляка. Яе паказалі ў відэа.

Тг-канал «Па-беларуску» публікуе жарты і мемы на беларускай мове. Сілавікі пішуць, што на канале прасоўваліся «лацінка і нянавісць да рускамоўнай сацыякультурнай прасторы».

Гамяльчука Дзмітрыя Шаўчэнку завочна асудзілі да 15 сутак арышту

Сёння ў судзе Цэнтральнага раёна Гомеля разглядзелі справу 47-гадовага рамесніка Дзмітрыя Шаўчэнкі. Яшчэ 12 снежня 2022 года супраць яго склалі пратакол паводле арт. 19.11 КаАП (распаўсюд экстрэмісцкіх матэрыялаў).

Сам Дзмітрый на суд не прыйшоў, але гэта не перашкодзіла суддзі Віктару Казачку разглядзець справу без асобы, у дачыненні да якой вядзецца адміністрацыйны працэс. У выніку суд пастанавіў прызнаць Шаўчэнку вінаватым і прызначыць яму 15 сутак арышту.

У Оршы арыштаваная зааабаронца Алена Мірашнічэнка

Сёння нечакана адбыўся арышт і адразу ж суд над Аленай Мірашнічэнка, паведамляюць аршанскія праваабаронцы.

Алена — вядомая ў Оршы зааабаронца. Ініцыятыва «Хвосцікі» ў якой удзельнічае Алена, штомесяц дапамагае дзясяткам бадзяжных жывёлаў. Пару дзён таму ёй даслалі павестку з пазнакай, што супраць яе распачата адмінсітрацыйная справа. Сёння днём Алена па павестцы з'явілася ў міліцыю і яе арыштавалі. Наколькі нам вядома, яе абвінавацілі ў правядзенні несанкцыянаванага масавага мерапрыемства.

Адразу ж адбыўся і суд. Алену асудзілі на 15 сутак. Падобна на тое, што прычынай затрымання стала тое, што Алена ў двары аднаго з дамоў правяла забаўляльна-адукацыйную сустрэчу з жыхарамі дома, каб патлумачыць як правільна абыходзіцца з бадзяжнымі жывёламі.

У "тэрарыстычны спіс" дадалі яшчэ восем беларусаў — цяпер у ім 1011 чалавек

Камітэт дзяржаўнай бяспекі абнавіў спіс «асоб, якія маюць дачыненне да тэрарыстычнай дзейнасці» — там з'явіліся прозвішчы яшчэ васьмі чалавек.

Сярод іх старшыня незалежнага прафсаюза на «Беларуськаліі» Аляксандр Мішук, старшыня першаснай прафсаюзнай арганізацыі Свабоднага Саюза металістаў на МАЗе Арцём Жарнак, а таксама Максім Бас, Данііл Чаўнакоў , Дзмітрый Іванчанка, Міхаіл Нямцоў, Юрый Трапачоў і Андрэй Краўчук.

Цяпер у «тэрарыстычным спісе» 1011 чалавек, з іх 264 — беларусы.

Супраць палітзняволенай Алены Гнаук узбудзілі новую справу за "злоснае непадпарадкаванне адміністрацыі калоніі"

Палітзняволеную актывістку з Пружанаў Алену Гнаук 15 жніўня перавялі ў папраўчую калонію № 4. Нядаўна жанчыну змясцілі ў ПКТ да 24 лютага. Акрамя гэтага, яе пазбавілі амаль усіх перадач, званкоў, спатканняў і скарацілі атаварку з 3 базавых велічыняў да 1 (32 рублі).

Цяпер стала вядома, што па ініцыятыве адміністрацыі гомельскай калоніі супраць Алены ўзбудзілі крымінальную справу паводле ч. 1 арт. 411 КК за "злоснае непадпарадкаванне патрабаванням адміністрацыі калоніі".

Нагадаем, 17 чэрвеня палітзняволеную асудзілі на тры з паловай гады калоніі ва ўмовах агульнага рэжыму і штраф 3200 рублёў. Алену прызналі вінаватай па двух артыкулах КК.

Падтрымайце Алену лістамі салідарнасці і не забывайце класці пустыя канверты, маркі, налепкі, асадкі і паперу разам з лістом: ПК-4, 246035, г. Гомель, вул. Антошкіна, 3, 8 атрад, Алене Пятроўне Гнаук

ГУБАЗ затрымаў Міхаіла Кавяза па даносе чат-рулетчыка

Як паведамляе "Наша Ніва", хлопцу 27 гадоў. Ён родам з Чашнікаў, цяпер жыве ў Мінску. Яго затрымлівалі падчас жнівеньскіх падзей у 2020 годзе і арыштавалі на 13 сутак.

У відэа правакатара Ігара Канюшыка, які прадставіўся ўкаінскім бежанцам, хлопец распавядае, што з 2020 года вучыць беларускую мову і размаўляе па-беларуску. На канале ГУБАЗіК сцвяржаецца, што хлопца зжо затрымалі. У віну яму ставяць тое, што ён казаў у чат-рулетцы - рэгістрацыя ў плане "Перамога" і ўдзел у пратэстах.

Інфармацыя дапаўняецца.