Памочніка машыніста з Гомеля Юрыя Трапачова пакаралі калоніяй па пратэсных артыкулах
Юрый Трапачоў. Фота з сацыяльных сетак.
У Гомельскім абласным судзе 9 лістапада ў закрытым судовым пасяджэнні вынесены прысуд Юрыю Трапачову. Яго абвінавацілі ў стварэнні экстрэмісцкага фарміравання (ч.1 арт. 361-1), паклёпе на прэзідэнта (ч. 2 арт. 367), распальванні іншай сацыяльнай варожасці (ч. арт. 130), а таксама ў арганізацыі і падрыхтоўцы дзеянняў, якія груба парушылі грамадскі парадак (ч.1 арт. 342 Крымінальнага кодэкса).
Судовы працэс пачаўся 2 лістапада, суддзя – Алег Харошка.
Пакуль вядома, што абвінавачаны Трапачоў працаваў памочнікам машыніста ў лакаматыўным дэпо ў Гомелі, яму – 41 год.
Быў прызнаны вінаватым у кіраўніцтве экстрэмісцкім фарміраваннем, і на падставе ч. 1 арт. 361-1 Крымінальнага кодэкса яму прызначанае пакаранне ў выглядзе пазбаўлення волі на тэрмін тры гады.
Ён жа прызнаны вінаватым у арганізацыі групавых дзеянняў, якія груба парушаюць грамадскі парадак і спалучаных з відавочным непадпарадкаваннем законным патрабаванням прадстаўнікоў улады, пры адсутнасці прыкмет больш цяжкага злачынства, і на падставе ч.1 арт. 342 КК яму прызначанае пакаранне ў выглядзе пазбаўлення волі на тэрмін два гады.
Ён жа прызнаны вінаватым у наўмысных дзеяннях, накіраваных на ўзбуджэнне іншай сацыяльнай варожасці па прыкмеце іншай сацыяльнай прыналежнасці, і на падставе ч.1 арт. 130 Крымінальнага кодэкса яму прызначана пакаранне ў выглядзе пазбаўлення волі на тэрмін тры гады.
Ён жа прызнаны вінаватым у паклёпе ў дачыненні да Прэзідэнта Рэспублікі Беларусь, якая змяшчаецца ў інфармацыі, размешчанай у глабальнай камп'ютарнай сетцы Інтэрнэт, злучанай з абвінавачваннем у здзяйсненні цяжкага і асабліва цяжкага злачынстваў, і на падставе ч.2 арт. 367 КК яму прызначана пакаранне ў выглядзе пазбаўлення волі на тэрмін два гады.
Суд пастанавіў шляхам частковага складання абвінавачанняў, канчаткова прызначыць пакаранне ў выглядзе пазбаўлення волі на тэрмін чатыры гады з адбываннем у папраўчай калоніі ва ўмовах узмоцненага рэжыму.
