Студэнта педагагічнага ўніверсітэта асудзілі да 2 гадоў і 2 месяцаў калоніі і ўнеслі ў "спіс тэрарыстаў"

У Мінскім гарадскім судзе 15 жніўня 21-гадовага студэнта чацвёртага курса гістарычнага факультэта БДПУ Мацвея Гранкевіча судзілі па двух артыкулах Крымінальнага кодэкса: ч. 1 арт. 342 (удзел у дзеяннях, якія груба парушаюць грамадскі парадак) і ч. 1 арт. 130 (распальванне іншай сацыяльнай варожасці). Па словах сукамерніка, пераследавалі хлопца, у тым ліку за каментары ў сацсетках. Стала вядома, што суддзя Наталля Бугук асудзіла яго да двух гадоў і двух месяцаў калоніі.  

Мацвей Гранкевіч

Вядома, што раней Мацвея затрымлівалі за ўдзел у акцыях пратэсту ў 2020 годзе. У межах крымінальнай справы затрымалі наўпрост у дэканаце 10 лістапада 2021 года — яго ідэнтыфікавалі па фота з мітынгаў.

15 верасня КДБ унёс яго ў "спіс, датычных да тэрарыстычнай дзейнасці". Гэта адзін з самых маладых "тэрарыстаў" у Беларусі. Цяпер хлопец утрымліваецца ў магілёўскай турме. 

1 кастрычніка Мацвею споўніцца 22 гады — падтрымайце яго лістамі салідарнасці і пасылкамі. Грашовыя пераводы хлопцу забаронены цяпер праз тое, што яго змясцілі ў "спіс тэрарыстаў".

Адрас для падтрымкі: Турма №4, 212011, г. Магілёў, вул. Крупскай, 99А, Гранкевіч Мацвей Аляксеевіч