Праваабарончая праграма "Вясна" на Беларускім Радыё Рацыя
Кожны аўторак у 20:05 па беларускім часе (паўтор у суботу ў 7:00) у эфіры незалежнай радыёстанцыі "Беларускае Радыё Рацыя" — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць праз інтэрнэт тут альбо тут (калі не адкрываецца, то карыстайцеся VPN). А таксама 98,1 FM для Гродна і 99,2 FM для Брэста.
(Анонсы папярэдніх выпускаў глядзіце тут).
Анонс праграмы на 7 ліпеня:
Крымінальны пераслед: Пачаўся новы судовы працэс над палітзняволенай журналісткай Кацярынай Андрэевай за “здраду дзяржаве”, але пра яго нічога невядома. Справу светлагорскіх рэйкавых партызанаў перадалі ў пракуратуру — і Следчы камітэт напісаў, што ім пагражае смяротнае пакаранне. Але ж адпаведныя змены ў Крымінальны кодэкс на момант іх затрымання яшчэ не набылі моц — чаму тады Следчы камітэт так піша і што вядома пра трох рэйкавых партызанаў са Светлагорска?
Падзея: Беларуская праваабарончая школа запускае Паглыблены курс па правах чалавека. Заяўкі прымаюцца да 12 ліпеня. Апошні раз такі курс праводзіўся ў 2020 годзе — падчас пандэміі і жорсткіх рэпрэсій. Цяпер жа ён улічвае актуальныя тэмы, зыходзячы з цяперашняй сітуацыі: напрыклад, што такое Міжнароднае гуманітарнае права і хто такія палітвязні? Падрабязнасці — у размове з камунікацыйнай мэнэджаркай БПШ і праваабаронцай “Вясны” Дар’яй Рублеўскай.
Асоба: 2020-ы год быў не толькі сумным і жахлівым на падзеі:
“2020 падарыў мне таксама і майго чалавека, з якім мы стварылі сям’ю”.
Сваю гісторыю распавядае беларуска Марыя — дапамагала маці палітвязня, а потым закахалася ў яго самога:
“Узяла на тыдзень за свой кошт на працы, каб схадзіць [да яго] на суд. Там у першы раз мы і пабачыліся”.
Па-за межамі: У Моладзевым хабе ў Варшаве беларусы збіраюцца, каб падпісаць паштоўкі палітвязням.
“Я пасылала шмат лістоў, знаходзячыся ў Беларусі, але не атрымала ніводнага адказа. Зараз вырашыла паспрабаваць яшчэ раз”.
“Калі я была ў Беларусі, я пісала шмат лістоў. Калі я з’ехала, то была лічба 234. Цікава, што я вяла статыстыку: у мяне было адказаў 10-15 адсоткаў”.
“Людзі не вельмі спадзяюцца, што атрымаюць адказы, але ўсё роўна ходзяць і пішуць”.
У музычных паўзах — кампазіцыі ў выкананні гурта "Варган". Яго салістку Ксенію Глот на мінулым тыдні асудзілі на 15 сутак арышту.
Аўдыязапіс выпуску:
