Прафсаюзных актывістаў Фядыніча і Бераснева перавялі ў СІЗА на Валадарскага
Генадзь Фядыніч у Мінгарсудзе. Фота: ПЦ "Вясна"
Больш за 20 дзён прайшло з моманту затрымання 19 красавіка лідараў і актывістаў незалежных беларускіх прафсаюзаў. Дагэтуль інфармацыі па справе пераследу прафсаюзных актывістаў следчыя органы не даюць.
Па стане на 10 траўня праваабаронцам вядома, што аднаго з затрыманых і змешчаных у СІЗА КДБ, былога кіраўніка незалежнага прафсаюза работнікаў радыёэлектроннай прамысловасці (РЭП) Генадзя Фядыніча перавялі ў СІЗА на Валадарскага. Фядыніч быў затрыманы 19 красавіка падчас масавага «хапуна» прадстаўнікоў незалежных прафсаюзаў.
Пераведзены на Валадарку і лідар аршанскага незалежнага прафсаюзу РЭП Васіль Бераснеў.
Па папярэдняй інфармацыі іх абвінавачваюць ва ўдзеле ў экстрэмісцкім фарміраванні (ч.1 арт. 361 Крымінальнага кодэкса).
У Генадзя Фядыніча ў СІЗА абвастрыліся праблемы са здароўем — праз стрэс узровень цукру ў крыві амаль не збіваецца інсулінам.
Вядома таксама, што ў СІЗА КДБ ім не перадавалі лістоў і перадач. Берасневу нават акуляры не перадалі.
Крымінальны пераслед прафсаюзных лідараў і актывістаў застаецца для грамадства таямніцай
Частку затрыманых актывістаў незалежных прафсаюзаў абвінавачваюць ва ўдзеле ў дзеяннях, якія груба парушаюць грамадскі парадак.
Так, кіраўнік ячэйкі свабоднага прафсаюза з Полацка Мікалай Шарах выйшаў з СІЗА КДБ пад падпіску аб нявыездзе і належных паводзінах. Яго падазраюць па ч.1 арт. 342 Крымінальнага кодэкса (удзел у дзеяннях, якія груба парушаюць грамадскі парадак).
Дагэтуль застаецца за кратамі 66-гадовы намеснік старшыні Свабоднага прафсаюзу металістаў Аляксандр Еўдакімчык, якога таксама абвінавачваюць па ч.1 арт. 342 Крымінальнага кодэкса.
