Жыхара Мінска Усніча пакаралі калоніяй за ўдзел у жнівеньскіх акцыях пратэсту 2020 года
Юрый Усніч. Фота з сацыяльных сетак
Суд Маскоўскага раёна Мінска 12 красавіка вынес прысуд палітзняволенаму тэсціроўшчыку Юрыю Уснічу, якога абвінавацілі ў арганізацыі і падрыхтоўцы дзеянняў, якія груба парушаюць грамадскі парадак, альбо актыўным ўдзеле у іх (ч.1 арт. 342 Крымінальнага кодэкса).
Справу разглядала суддзя Таццяна Пірожнікава.
Юрый Усніч быў затрыманы 13 студзеня 2022 года і пасля прад’яўлення абвінавачання быў змешчаны ў СІЗА №1 Мінска. У канцы сакавіка 2022 справу Юрыя перадалі ў пракуратуру.
Абвінавачаны скончыў Мінскі радыётэхнічны каледж і Інстытут інфармацыйных тэхналогій БДУІР.
Вучыць англійскую, працаваў да затрымання тэсціроўшчыкам, а да гэтага быў кладаўшчыком. На новым месцы папрацаваў 3 месяцы.
Судовы працэс пачаўся 8 красавіка.
Згодна матэрыялаў абвінавачання, Юрый Усніч прымаў актыўны ўдзел у акцыях пратэсту ў жніўні 2020 года ў Мінску, у тым ліку на Плошчы і праспекце Незалежнасці, груба парушаў грамадскі парадак, выкрыкваў лозунгі, перашкаджаў руху грамадскага транспарту, не падпарадкоўваўся патрабаванням супрацоўнікаў унутраных спраў.
Суд пастанавіў прызнаць Юрыя Усніча вінаватым і прызначыў яму пакаранне ў выглядзе пазбаўлення волі ў калоніі агульнага рэжыму тэрмінам на два з паловай гады.
