Чацверты дзень жадаючыя не могуць патрапіць на адкрыты судовы працэс над сябрамі ініцыятыўнай групы Ціханоўскай Дапоўнена

2021 2021-04-15T18:08:34+0300 2021-04-16T09:38:21+0300 be https://spring96.org/files/images/sources/kaneuskaja-sud-gomel-1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Суд над сябрамі ініцыятыўнай групы Святланы Ціханоўскай у Гомелі 12 красавіка.

Суд над сябрамі ініцыятыўнай групы Святланы Ціханоўскай у Гомелі 12 красавіка.

У судзе Чыгуначнага раёна Гомеля 15 красавіка працягваўся разгляд гучнай крымінальнай справы, заведзенай на сябраў ініцыятыўнай групы кандыдаткі Святланы Ціханоўскай.

На лаве падсудных – палітвязні  Таццяна Канеўская, Юрый Уласаў, Дзмітрый Івашкоў і Аляксандр Шабалін.

Абвінавачванне ім прад'яўленае па па частцы 2 артыкула 293 Крымінальнага кодэксу (удзел у масавых беспарадках), па артыкуле 292 Крымінальнага кодэксу - «захоп будынкаў», а  Юрый Уласаў дадаткова абвінавачваецца ў «публічнай абразе прадстаўніка ўлады» (частка 1 артыкулу 369 Крымінальнага кодэксу).

Справу разглядае суддзя Аляксей Хлышчанкоў. 

14 красавіка дапытвалі пацярпелых па справе аб абразе службовых асобаў (ДАІшнікаў, АМАПаўцаў у лістападзе 2019 года). Допыт адбываўся ў закрытым рэжыме, бо сілавікі не жадалі, каб разгалошваліся іх персанальныя дадзеныя. На паседжанні праглядалася  таксама відэа сустрэчы гомельскай ініцыятыўнай групы кандыдаткі са Святланай Ціханоўскай і яе памочнікамі 5 жніўня 2020 года. Відаць менавіта гэтае падслуханае відэа і лягло ў аснову абвінавачвання ў падрыхтоўцы масавых беспарадках і планах захопу адміністратыўных будынкаў у Гомлі.

Гомель: Пачаўся суд над сябрамі ініцыятыўнай групы Святланы Ціханоўскай

На пачатку працэсу Юрый Уласаў заявіў адвод суддзі Хлышчанкову. Суддзя яго адхіліў. Сваякі абвінавачваемых кажуць, што і суддзя, і пракурор кажуць вельмі ціха, так што немагчыма нічога расчуць. Нават пасля іх просьбы казаць гучней, сітуацыя не палепшылася.

Сёння, 15 красавіка, ізноў ніхто з незалежных журналістаў, праваабаронцаў, групы падтрымкі (апроч двух чалавек) трапіць на працэс не змаглі.

Журналістка Ларыса Шчыракова і валанцёрка Алена Тоцкая напісалі скаргі ў кнізе заўваг і прапаноў суду Чыгуначнага раёну.

Валанцёрка Алена Тоцкая, якая са жніўня мінулага году займаецца маніторынгам “палітычных” працэсаў, сёння напісала ўжо другую скаргу за нядопуск на гэты працэс. Яна мяркуе, што яе канстытуцыйные права прысутнічаць у адкрытым, судовым працэсе парушаецца. Алена прыйшла на сёняшнее паседжанне за 45 хвілінаў да пачатку, але на працэс яна так і не трапіла, паведамляе "Гомельская Вясна".

У мужа Таццяны Канеўскай Мікалая, якога дапыталі ў якасці сведкі, спыталі як даўно яны ў шлюбе, колькі Таццяна займаецца палітычнай дзейнасцю і ці ездзіла яна ў Менск на сустрэчу з Ціханоўскай 5 жніўня. Ён адказаў, што разам жывуць 39 гадоў, палітыкай жонка займалася каля году і ў Менск на сустрэчу з Ціханоўскай 5 жніўня яна ездзіла.

На працэс здолелі патрапіць супрацоўнікі дзяржСМІ, пяць студэнтаў юрыдычнага факультэта ўніверсітэту, тры сяброўкі Таццяны Канеўскай, жонка Юрыя Уласава і бацька Дзмітрыя Івашкова. Прадстаўнікоў незалежнай прэсы, праваабаронцаў і іншых наведвальнікаў у залю паседжання не пусцілі. Пакласці ў камеру захоўвання дамскія сумкі папрасілі сваякоў, знаёмых абвінавачаных і студэнтаў. Супрацоўнікі дзяржСМІ сядзелі з тэлефонамі.

Апошнія навіны

Партнёрства

Сяброўства