Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць на сайце Беларускага Радыё Рацыя па любых са спасылак тут, альбо тут.
Анонс праграмы на 9 сакавіка:
Падзея: 8 сакавіка — Міжнародны дзень салідарнасці жанчын у барацьбе за свае правы. Узгадаем сапраўдны сэнс гэтага дня, а таксама — дзяўчат і жанчын, якіх рэпрэсавалі ў Беларусі ў поствыбарчы перыяд.
Крымінальны пераслед: “нуль праміле”, раскіданыя самарэзы, проціватанкавыя “вожыкі” (згодна з фэйкавым сюжэтам на ОНТ), удзел 9 жніўня 2020 года ў мірным пратэсце і спроба ўцякчы ад сілавікоў, якія разбівалі аўтамабілі — за што асуджалі беларусаў на мінулым тыдні? Таксама ўзгадаем, як крымінальны пераслед развярнуўся супраць праваабаронцаў.
Па-за межамі: Як на міжнародным узроўні працуюць праваабаронцы дзеля абароны правоў беларусаў? Старшыня ПЦ “Вясна” Алесь Бяляцкі наведаў Жэневу – што там было, які рэзультат гэта дасць і як афіцыйную Беларусь успрымае міжнародная супольнасць?
У музычных паўзах — кампазіцыі розных жанчын-выканаўцаў: Katka, IMGNN, юность, Кася Камоцкая і Маргарыта Ляўчук.
