Супраць Ціханоўскай і членаў КС узбуджаныя справы аб стварэнні экстрэмісцкага фарміравання і змове з мэтай захопу ўлады
Генпракуратура ўзбудзіла крымінальную справу аб стварэнні экстрэмісцкага фарміравання (артыкул 361-1 КК) супраць членаў Каардынацыйнага савета, паведамляе ведамства ў телеграм-канале.
- Каардынацыйная рада. Фота: TUT.BY
Крымінальная справа распачатая ў дачыненні да Святланы Ціханоўскай, Марыі Калеснікавай, Максіма Знака, Паўла Латушкі, Вольгі Кавальковай, Сяргея Дылеўскага "і іншых асоб". Што гэта за "іншыя асобы" — не паведамляецца.
Як піша прэс-служба ведамства, гэта справа пачата «з улікам дадзеных, атрыманых у ходзе расследавання СК» крымінальнай справы аб закліках да захопу ўлады (частка 3 артыкула 361 КК).
Акрамя гэтага, у дачыненні да стваральніка фонта By_Help Андрэя Лявончыка і іншых неназваных грамадзян узбуджаная справа аб фінансаванні дзейнасці экстрэмісцкага фармавання паводле артыкула 361-2 КК.
Таксама паведамляецца, што па паручэнні Генпракуратуры Следчы камітэт распачаў крымінальную справу аб змове з мэтай захопу ўлады неканстытуцыйным шляхам (частка 1 артыкула 357 КК) супраць членаў Каардынацыйнага савета. Канкрэтныя імёны падазраваных па гэтай справе не называюцца. Пакаранне па гэтым артыкуле да 12 гадоў зняволення.
