Бабруйск: датэрміновае галасаванне кантралюецца працадаўцамі
У Бабруйску працягваецца ажыятаж вакол датэрміновага галасавання. Складаецца ўражанне, што ў асноўны дзень галасавання на ўчасткі проста няма каму будзе ісці.
У навучальных установах і на прадпрыемствах праводзяцца тэрміновыя сходы, на якіх кіраўніцтва, дзе пагрозамі, а дзе і ўгаворамі заклікае бабруйчан галасаваць датэрмінова.
-Нас сёння адпусцілі з працы раней, і працоўных, і майстроў, каб пайшлі прагаласавалі. Кажуць, будуць кантраляваць кожнага. Мы мусім сказаць потым на працы нумар участка, і яны будуць звязвацца з сябрамі ўчастковых камісій, каб праверыць кожнага, - расказала незалежным назіральнікам Наталля, працоўная ААТ "Белшына".
Праходзяць падобныя сходы і ў навучальных установах. Навучэнцы практычна ўсе ўжо прагаласавалі, зараз ідэолагі "апрацоўваюць" персанал і выкладчыкаў.
Што тычыцца навучэнцаў, газета гарвыканкаму таксама фіксуе іх масавае галасаванне, але тлумачыць яго асабістым жаданнем маладых людзей. Напрыклад, у артыкуле пад назвай "Навучэнцы гандлёва-эканамічнага каледжа галасуюць датэрмінова" ёсць такія радкі: "Навучэнцы, якія пражываюць у інтэрнаце, усведамляючы важнасць гэтай падзеі і сваю адказнасць, вырашылі прагаласаваць датэрмінова".
