У ЮНІСЕФ заклікалі дапамагчы дзецям, пацярпелым у ходзе пратэстаў у Беларусі
Ілюстрацыйнае фота Маршу 23 верасня 2020 года ў Мінску
У ЮНІСЕФ назвалі "важным першым крокам" рашэнне беларускіх уладаў вызваліць некаторых затрыманых, у тым ліку непаўналетніх. Пра гэта заявіла рэгіянальны дырэктар дзіцячага фонду ААН Афшан Хан. Разам з тым яна выказала заклапочанасць з нагоды паведамленняў аб празмерным ужыванні сілы супраць удзельнікаў акцый пратэсту, у тым ліку – супраць непаўналетніх.
"У ЮНІСЕФ гатовыя падтрымаць усе дзеянні, накіраваныя на абарону і далейшае прасоўванне правоў дзяцей у Беларусі", - гаворыцца ў заяве Хан.
У гэтым кантэксце ў дзіцячым фондзе ААН нагадалі аб Канвенцыі аб правах дзіцяці, у якой гаворыцца пра тое, што арышт, затрыманне або заключэнне дзіцяці павінны ажыццяўляцца ў адпаведнасці з заканадаўствам, быць кароткімі па часе і прымяняцца выключна ў якасці скрайняй меры.
У такіх выпадках улады абавязаныя "неадкладна апавясціць афіцыйных апекуноў дзіцяці, якія таксама павінны прысутнічаць падчас любых дзеянняў, якія ажыццяўляюцца праваахоўнымі органамі ў дачыненні да непаўналетніх".
"Дзеці сталі сведкамі [гвалту], а ў многіх выпадках і наўпрост пацярпелі ў выніку палітычнага гвалту ў краіне, - падкрэсліла Афшан Хан. - Яны маюць патрэбу ў неадкладнай медыцынскай, псіхалагічнай і юрыдычнай падтрымцы".
Пратэсты ў Беларусі пачаліся пасля прэзідэнцкіх выбараў, якія адбыліся ў краіне ў мінулую нядзелю, 9 жніўня. Людзі выйшлі на вуліцы пасля з'яўлення дадзеных аб парушэннях, дапушчаных у ходзе галасавання.
У бальніцу з Партызанскага РУУС Мінска прывезлі моцна збітага 16-гадовага падлетка, ён быў у коме
