Затрыманых напярэдадні мазырчукоў паспелі асудзіць? Дапоўнена
Аляксандр Цуканаў. Скрыншот з відэа.
Затрыманыя 5 чэрвеня ў Мазыры аўтар канала "Мозырь для жизни" Аляксандр Цуканаў і Дзяніс Колас атрымалі па 15 сутак адміністрацыйнага арышту. Інфармацыя атрыманая ад іх сяброў. Мясцовыя праваабаронцы спрабуюць спраўдзіць гэтую інфармацыю і высветліць акалічнасці судовых працэсаў.
Вядома толькі, што Цуканава затрымлівалі сілавікі ў чорных масках, заламалі яму рукі і закінулі ў серабрысты аўтамабіль Skoda. За дзень да затрымання ён правёў у міліцыі каля дзесяці гадзін, пасля чаго яго выпусцілі. А назаўтра затрымалі зноў.
У другой палове дня быў таксама затрыманы фермер Аляксандр Вянгура, той, пра якога здымаў сюжэт блогер Сяргей Ціханоўскі. Ён пайшоў у аддзяленне міліцыі, каб забраць назад напярэдадні канфіскаваны пад час ператрусу ноўтбук. У выніку яго затрымалі.
Інфармацыі па ім няма і дагэтуль.
Дапоўнена: Як паведамляе "Радыё Свабода", Аляксандра Вянгуру таксама асудзілі да 15 сутак арышту нібыта за непадпарадкаваньне міліцыі і дробнае хуліганства.
«Дзе ён гэта здзейсьніў? У міліцыі, куды пайшоў забіраць свой ноўтбук?» — пытаецца жонка Аляксандра Ірына.
Раней, чацвёртага чэрвеня, у Аляксандра Вянгуры адбываўся ператрус.
Паводле якіх артыкулаў былі асуджаныя Дзяніс Колас і Аляксандар Цуканаў, пакуль невядома.
