"Вясна" праінфармавала спецдакладчыкаў ААН аб арыштах берасцейскіх актывістаў
У сувязі з арыштам на працяглыя тэрміны экалагічных актывістаў з Брэста Аляксандра Кабанава, Дзмітрыя Андрасюка і Дзмітрыя Бекалюка было накіравана паведамленне спецыяльным дакладчыкам Савета ААН па правах чалавека. Паведамленне падрыхтавалі юрысты і валанцёры Праваабарончага цэнтру “Вясна”.
Аб пераследзе трох актывістаў за удзел у мірным сходзе, што прайшоў у Берасці 12 красавіка, былі праінфармаваныя:
- Спецыяльны дакладчык па пытанні аб праве на свабоду мірных сходаў і свабоду асацыяцыі.
- Спецыяльны дакладчык па пытанні аб заахвочванні і абароне права на свабоду меркаванняў і іх свабоднае выказванне.
- Спецыяльны дакладчык па пытанні аб становішчы ў галіне правоў чалавека ў Беларусі.
У паведамленні праваабаронцы звярнулі ўвагу спецдакладчыкаў на тое, што арышт берасцейскіх актывістаў з'яўляецца пакараннем за выказванне імі свайго меркавання аб небяспецы для экалогіі пабудаванага акумулятарнага завода, а таксама за выказванне імі свайго меркавання аб бягучай сітуацыі ў краіне.
Пакаранне арыштам на 15 сутак трох чалавек (аднаго за арганізацыю мірнага сходу па ч. 2 арт. 23.34 КаАП і дваіх за ўдзел у ім па ч.3 арт. 23.34 КаАП) з'яўляецца непрапарцыйным абмежаваннем права на свабоду сходаў. Гэтае абмежаванне не мела пад сабой законных мэтаў, пералічаных у арт. 21 Міжнароднага пакта аб грамадзянскіх і палітычных правах.
У паведамленні праваабаронцы прывялі храналогію падзей, звязаных з пераследам актывістаў, распавялі пра парушэнні працэсуальных правоў затрыманых, назвалі прозвішчы суддзяў, датычных да палітычна матываванага пераследу.
Нагадаем, што Дзмітрый Бекалюк, Аляксандр Кабанаў і Дзмітрый Андрасюк былі затрыманыя 17 і 18 красавіка напярэдадні штотыднёвай нядзельнай акцыі "кармлення галубоў". На іх былі складзены пратаколы па арт. 23.34 КаАП – за ўдзел у папярэдняй акцыі пратэсту, якая прайшла 12 красавіка. 20 красавіка суддзі Ленінскага раённага суда Брэста Дзмітрый Шурын і Дзмітрый Куроўскі вынеслі рашэнне пакараць Дзмітрыя Андрасюка і Аляксандра Кабанава 15-суткавымі тэрмінамі арышту. 22 красавіка аналагічная рашэнне вынес суддя таго ж суда Аляксандр Семянчук.
Пасля вынясення такіх судовых рашэнняў ПЦ "Вясна" выступіў з заявай, у якой заклікаў адмовіцца ад арыштаў на перыяд распаўсюджвання віруса COVID-19.
![]()
"Вясна" заклікае адмовіцца ад арыштаў на перыяд распаўсюджвання віруса COVID-19
Таксама пра пераслед берасцейскіх экалагічных актывістаў грамадскае аб'яднанне "Экадом" праінфармавала Камітэт па выкананні Орхускай канвенцыі ЕЭК ААН.
![]()
Экадом праінфармаваў Камітэт па выкананні Орхускай канвенцыі аб пераследзе брэсцкіх актывістаў
Навіны ад Spring96.org у Telegram. Падпішыся на наш канал https://t.me/viasna96