Кропка болю: у Берасці ўлады пайшлі на канфрантацыю

На плошчы Леніна ў Берасці 14 красавіка прайшло традыцыйнае “кармленне галубоў” - акцыя у знак пратэсту супраць будаўніцтва акумулятарнага завода, якая праз паўгадзіны пасля пачатку перарасла ў мітынг.

Па інфармацыі “Брэсцкай газеты”,  да пачатку мірнага сходу  міліцыя забрала з плошчы блогера з Бярозы Аляксандра Кабанава. Пазней быў затрыманы і Дзмітрый Бекалюк, а ў 13.20 АМАП забраў Алеся Абляка і яшчэ дваіх чалавек.

"Будучы на ​​плошчы, ён дастаў гучнагаварыцель і пачаў сваю прамову. Затым людзі пайшлі па вуліцах Пушкінскай і Савецкай. Абляка паспрабавалі затрымаць каля кінатэатра "Беларусь". Яго атачылі людзі, пачалася бойка. Міліцыянты былі ў цывільным. Але іх было мала, таму народ абараніў актывіста. А вось ужо перад праспектам Машэрава яго затрымалі сумесна з супрацоўнікамі АМАП, але не аднаго. Забралі і Ягора Кандрацюка. Магчыма, на эмоцыях ".

Па словах праваабаронцы Рамана Кісляка, у 12.30, затрымалі і Таццяну Фесікаву - у Ленінскім РАУС, куды яна пайшла па позве. Як мяркуецца, забралі яшчэ аднаго хлопца - Арцёма. Гэта ўжо было пасля таго, як людзі пайшлі да ЦУМу.

Нагадаем, перад выходнымі ў Берасці затрымалі і да суда адправілі ў ІЧУ 10 праціўнікаў завода, у тым ліку аднаго з лідэраў ініцыятыўнай групы Дзям'яна Лепясевіча і маці дваіх дзяцей Кацярыну Басаргіну.

Паводле папярэдняй інфармацыі, іх узялі за парушэнне парадку арганізацыі або правядзення масавых мерапрыемстваў (артыкул 23.34 КаАП). Хутчэй за ўсё, гаворка ідзе пра шэсці па вуліцы Савецкай 7 красавіка, падчас якога людзі скандавалі лозунгі супраць завода.

Чакаецца, што 15 красавіка затрыманых будуць судзіць. Пасля абеду Басаргіна паведаміла, што ноччу яе вызвалілі.

Акрамя таго, сёння па позве хадзілі ў міліцыю актывісты Ірына Сіліцкая і Віталь Казак. Сіліцкую адпусцілі, а Казака затрымалі.

Дзмітрыя Бекалюка з РАУС павезла хуткая.

Беларускае радыё Рацыя паведамляе прозвішча яшчэ аднаго затрыманагап. Гэта Віктар Сэндэр.