Віцебскіх актывістаў будуць судзіць за святкаванне Дня Волі

2019 2019-04-03T10:43:59+0300 2019-04-03T10:54:53+0300 be https://spring96.org/files/images/sources/viceblyan.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Браты Кійко каля Альгерда на БНР-101. Фота з vitebskspring.org

Браты Кійко каля Альгерда на БНР-101. Фота з vitebskspring.org

Напярэдадні Дня Волі 24 сакавіка віцебскія актывісты Уладзімір і Яраслаў Кійко ўшанавалі БНР-101 ускладаннем кветак да помнікаў князю Альгерду і Уладзімеру Караткевічу, а таксама да памятнай дошкі Васілю Быкава і да мэмарыялу, усталяванаму каля Успенскага сабору на месцы пахавання нявінна забітых грамадзянаў. Усё, што адбывалася падчас ускладання кветак, супрацоўнікі міліцыі ў цывільным фіксавалі на фота- і відэакамэры. Але ў той дзень нікога не затрымлівалі і не папярэджвалі, паведамляе "Віцебская Вясна".

Праз тыдзень на іх склалі адміністрацыйныя пратаколы паводле ч.1 арт. 23.34 КаАП Рэспублікі Беларусь – “за пікет з выкарыстаннем палотнішча бел-чырвона-белага колеру”.

Пратакол на Яраслава Кійко склаў міліцыянт Кастрычніцкага РАУС г. Віцебску Канстанцін Ярашэўскі. Прад’явіў яго Яраславу міліцыянт, які прыйшоў да яго дамой і назваўся ўчастковым.

“Гэты ж самы міліцыянт, што прыходзіў да мяне, заходзіў і да майго брата, але дома не застаў. Той казаў, што ён ягоны ўчастковы, хоць мы з братам жывем на розных вуліцах і ўчастковыя ў нас розныя. Праз дзень гэты міліцыянт чакаў  майго брата на выхадзе з тэатру. За паўгадзіны да гэтага я размаўляў з братам па тэлефоне, і той сказаў, што знаходзіцца ў тэатры. Таму я раблю выснову, што нашыя тэлефонныя размовы з братам праслухоўваюцца”, – расказаў “Віцебскай Вясне” Яраслаў Кійко.   

“Улада лёгка падмінае пад сябе і мараль, і закон, калі на кану стаіць пытанне кантролю за людзьмі, якія хочуць адчуваць сябе ў сваёй жа дзяржаве паўнавартаснымі грамадзянамі. Нават калі ты вырашыў у нядзельны святочны дзень сфатаграфавацца з традыцыйным і нікім не забароненым сьцягам гэтай краіны, ты ўжо трапляеш у разрад “нязгодных”, на жаль…" – дадае Яраслаў.

Актывісты з пратаколамі не пагадзіліся і даваць тлумачэнні адмовіліся. Суд над імі адбудзецца 11 красавіка ў 10.00 у будынку суду Кастрычніцкага раёну г. Віцебску.

Апошнія навіны

Партнёрства

Сяброўства