Cуд адмовіў у кампенсацыі шкоды незаконна затрыманым ў Дзень волі
Па прававую дапамогу ў ПЦ "Вясна" звярнуўся Максім Булкін, які разам з жонкай быў незаконна затрыманы 25 сакавіка 2017 года і адпушчаны з РУУС без складання якіх-небудзь працэсуальных дакументаў.
Ён распавёў, што ў той дзень з жонкай Наталляй Каценка вяртаўся дадому і на скрыжаванні вуліц К. Чорнага і Сурганава сутыкнуўся з міліцэйскім ачапленнем.
«Мы перайшлі дарогу і нам трэба было прайсці па прамой. Там, мабыць з мэтай забяспечыць не ўваходжанне грамадзян у той перыметр, дзе павінна было праходзіць масавае мерапрыемства, прымеркаванае да Дня волі, выставілі кардон міліцыі. Мы з супрацоўнікамі міліцыі пачалі размаўляць, каб нас прапусцілі прайсці, але зразумелі, што міліцыянты з намі размаўляюць вельмі непаважліва», - распавёў Максім Булкін.
Тады малады чалавек дастаў тэлефон і сказаў, што будзе весці відэаздымку:
«Я хацеў у супрацоўніка высветліць службовыя дакументы, каб прыцягнуць да адказнасці за неналежнае зносіны з грамадзянамі. Цягам 30-40 секунд мы з ім размаўлялі, ён адмаўляўся паказваць дакументы. Папрасіў мяне паказаць яму мой пашпарт. Я адразу паказаў, але ён так і не паказаў мне свае дакументы. Далей яму ззаду нехта крыкнуў: «Няхай праходзяць». Міліцыя расступіўся, мы з жонкай прайшлі, і як толькі мы зайшлі за іх спіны да нас падышлі людзі ў цывільным, заламалі руку за спіну жонцы і павялі з аўтобус. У мяне адбылася невялікая бойка, але мне таксама закруцілі рукі, парвалі куртку, сарвалі з рукі гадзіннік і закінулі ў спецтранспарт».
Пазней пару даставілі ў Маскоўскі РУУС, дзе пратрымалі да вечара і адпусцілі без складання пратаколаў затрымання, пратаколаў аб адміністрацыйным правапарушэнні.
«Мы адразу адправіліся ў ГУУС Мінгарвыканкама, дзе напісалі заяву на супрацьпраўныя дзеянні супрацоўнікаў міліцыі і пакінулі яе аператыўнаму дзяжурнаму. Недзе праз месяц атрымалі адказ з РУУС, куды ГУУС перанакіраваў нашу заяву, у якім было пазначана, што праверка была праведзена, а затрыманыя былі мы, як аказалася, за дробнае хуліганства, запрасілі прыехаць азнаёміцца з адміністрацыйнай справай, складзенай у дачыненні да нас».
Пратаколы былі складзеныя ў адносінах і Максіма Булкіна, і яго жонкі, аднак, без подпісаў затрыманых. Таксама і ў рапартах адсутнічалі дакладныя час і месца затрыманне, подпісы супрацоўнікаў АУС, якія іх складалі.
«Мы пачалі абскарджванне: звярнуліся ў пракуратуру, следчы камітэт, аднак адказы на нашы скаргі прыходзілі ад аднаго і таго ж супрацоўніка РУУС. Звярталіся затым і ва Упраўленне ўласнай бяспекі, каб там разабраліся, чаму не выконваецца закон "Аб зваротах грамадзян і юрыдычных асобаў". Адтуль жонцы прыйшоў адказ з выбачэннямі і толькі.
У выніку мы звярнуліся ў суд Цэнтральнага раёна г. Мінска з пазовам аб прызнанні нашага затрымання незаконным і кампенсацыі нам маральнай шкоды ў памеры адзін беларускі рубель».
18 ліпеня суддзя Вольга Паланевіч разгледзела грамадзянскую справу. Адказчыкам выступалі МУС і Міністэрства фінансаў.
«У рамках судовага працэсу мы прасілі далучыць да матэрыялаў справы відэазапіс нашага затрымання, а таксама запрасіць матэрыялы адміністрацыйных спраў, складзеных у дачыненні да нас. Аднак, наша хадайніцтва не было задаволена, дакументы адміністрацыйных спраў у суд не былі прадастаўлены, але суд усё роўна адбыўся», - падкрэсліў малады чалавек.
У ходзе слухання, аказалася, што яшчэ 4 красавіка і ў дачыненні да Максіма Булкіна, і ў дачыненні да яго жонкі адміністрацыйныя працэсы былі спыненыя з прычыны недаказанасці іх вінаватасці ў здзяйсненні адміністрацыйнага правапарушэння.
«Мы настойвалі, што незаконнымі дзеяннямі ў адносінах да сябе лічым прымяненне да нас грубай сілы, затрыманне без тлумачэння прычын, працяглае ўтрыманне ў будынку РУУС, што прычыніла нам маральныя і фізічныя пакуты. Але было відаць, што рашэнне па нашай справе ўжо даўно вызначана.
Тады мы папрасілі 30-хвілінны перапынак і падрыхтавалі яшчэ адно патрабаванне - прынесці нам прабачэнні, і прыклалі да гэтага хадайніцтва відэазапіс. Суду прыйшлося ўсё ж такі відэа затрымання праглядзець, дзе было відаць, як міліцыянты бяздзейнічаюць у той час, як нас затрымліваюць невядомыя асобы ў цывільным адзенні», - распавёў Максім Булкін.
Аднак, суд адмовіў у задавальненні іскавых патрабаванняў Максіму Булкіну і Наталлі Каценка, спаслаўшыся на тое, што складанне пратаколу аб адміністрацыйным правапарушэнні, адміністрацыйнае затрыманне і дастаўленне ў будынак Маскоўскага РУУС не сведчыць аб незаконнасці дзеянняў супрацоўнікаў АУС паколькі не пацягнула за сабой прыцягнення затрыманых да адміністрацыйнай адказнасці .
«Цяпер мы накіравалі прыватную скаргу на рашэнне суда Цэнтральнага раёна ў касацыйным парадку, каб нашу справу адправілі на паўторны разгляд», - адзначыў Максім Булкін.
