Затрыманні ў Гомелі Дапоўнена

У Гомелі напярэдадні першамайскай акцыі адбыліся затрыманні шэрагу актывістаў і журналістаў, якія пераследваліся за сваю актыўнасць падчас лютаўскіх і сакавіцкіх пратэстаў, якія ў гэтым абласным цэнтры адзначаліся шматлюднасцю.

Пра затрыманні паведамляе праваабаронца Андрэй Стрыжак на сваёй старонцы ў Фэйсбуку.  

Журналіст-фрылансер Яўген Меркіс затрыманы 30 красавіка ў Навабеліцкім раёне, дастаўлены ў ІЧУ (мяркуючы па ўсім, да 2 траўня будзе ўтрымлівацца там да суда).

Грамадзянскі актывіст Андрэй Макараў затрыманы раніцай 1 траўня на выхадзе з дому. Яго месцазнаходжанне і лёс удакладняецца.

Актывіст Незалежнага прафсаюза РЭП Віктар Рубцоў, затрыманы каля пад'езда свайго дома, паведаміў, што яго прывезлі ў РАУС Савецкага раёна.

Журналістка Марына Драбышэўская паведаміла пра тое, што за яе кватэрай вялося вонкавае назіранне, аднак ёй удалося пазбегнуць затрымання.

Блогера Максіма Філіповіча супрацоўнікі міліцыі ў цывільным не выпускалі з пад'езду - са словамі, што яму небяспечна выходзіць і прапановай праехаць на прафілактычную размову.

1 траўня ў Гомелі мясцовыя ўлады дазволілі першамайскі мітынг, пачатак якога заяўлены на 12-ю гадзіну каля палаца культуры Беларускага таварыства глухіх «Віпра». Чакаецца, што ў акцыі возьмуць удзел прадстаўнікі шэрагу апазіцыйных партый, якія плануюць прыняць зварот да ўрада і прэзідэнта з патрабаваннямі аб адмене дэкрэта № 3, спыненні роста тарыфаў на камунальныя паслугі, павышэнні заробкаў.