Магілёўская міліцыя выгароджвае дэпутата Марзалюка

2017 2017-04-01T17:29:00+0300 2017-04-03T17:34:39+0300 be https://spring96.org/files/images/sources/marzaliuk.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Дэпутат Палаты прадстаўнікоў Ігар Марзалюк на мітынгу

Дэпутат Палаты прадстаўнікоў Ігар Марзалюк на мітынгу

Пасля мітынгу пратэсту 15 сакавіка затрымалі амаль усіх выступоўцаў, акрамя дэпутата Палаты прадстаўнікоў. Супрацоўнікі органаў унутраных спраў не ўбачылі ў яго дзеяннях складу правапарушэння.

Як паведамляе магілёўскі праваабарончы сайт mspring.online, мясцовы актывіст і праваабаронца Аляксандр Хамратаў быў абураны брутальным хапуном, які адбыўся пасля Марша недармаедаў 15 сакавіка. Тады былі схоплены і асуджаныя на штрафы і арышт каля дзесяці чалавек – практычна кожны, хто стаяў з банэрам або вяшчаў у мегафон. Сярод выступоўцаў быў дэпутат Палаты прадстаўнікоў Ігар Марзалюк. Хамратаў вырашыў высветліць, ці быў ён прыцягнуты да адказнасці і калі не, то чаму.

Для гэтага ён накіраваў запыт у Ленінскі РАУС з адпаведнымі пытаннямі. Адказаў яму намеснік начальніка РАУС падпалкоўнік Юрый Калацілкін, які не толькі прысутнічаў на акцыі, але і стараўся знаходзіцца непадалёк ад дэпутата: «У дачыненні да грамадзяніна Марзалюка І.А. службовымі асобамі Ленінскага РАУС г. Магілёва пратакол аб адміністратыўным правапарушэнні за парушэнне парадку арганізацыі або правядзення масавых мерапрыемстваў не складаўся з прычыны адсутнасці ў яго дзеяннях складу названага адміністрацыйнага правапарушэння».

Адначасова з гэтым Юрый Калацілкін прызнаў, што «15 сакавіка на вул. Ленінскай у г. Магілёве супрацоўнікамі органаў унутраных спраў, якія былі пры выкананні службовых паўнамоцтваў, сапраўды ажыццяўлялася адміністрацыйнае затрыманне грамадзян, якія ўчынілі адміністрацыйныя правапарушэнні».

Аляксандр Хамратаў адказам застаўся незадаволены.

– Дэпутат Палаты Прадстаўнікоў Нацыянальнага сходу Марзалюк прымаў удзел у несанкцыянаваным мітынгу і выступаў на ім з дапамогай прылад ўзмацнення голасу. Мяркую, вельмі важна вызначыць тонкую мяжу паміж дзеяннямі дэпутата Палаты Прадстаўнікоў Нацыянальнага сходу Марзалюка і тымі, хто аналагічным чынам прымаў удзел у акцыі, але хто атрымаў суровае пакаранне ў выглядзе арышту на 15 сутак, – лічыць Хамратов.

Праваабаронца ўжо накіраваў 30 сакавіка адпаведны ўдакладняючы запыт у Ленінскі РАУС.

Апошнія навіны

Партнёрства

Сяброўства