Палата Прадстаўнікоў: "Усе законы канстытуцыйныя"

У межах маніторынгу ўмоў утрымання адміністрацыйна арыштаваных у ІЧУ праваабаронцы вывучаюць не толькі сітуацыю, але і заканадаўства, пішуць "Праваабаронцы супраць катаванняў". Так, у адпаведнасці з Правіламі ўнутранага распарадку месцаў адбыцця адміністрацыйнага арышту без дазволу начальніка месца адбыцця арышту не прымаюцца перадачы для арыштантаў ад асобаў, якія не з'яўляюцца для адміністрацыйна арыштаванага блізкімі сваякамі.

Праваабаронца Вікторыя Фёдарава накіравала ініцыятыўныя звароты ўсім суб'ектам, упаўнаважаным на ўнясенне ў Канстытуцыйны Суд прапаноў аб праверцы канстытуцыйнасці дадзенага становішча.

Пасля разгляду звароту пастаянная камісія па нацыянальнай бяспецы Палаты прадстаўнікоў прапанавала Міністэрству ўнутраных спраў сумесна з Міністэрствам юстыцыі прааналізаваць ініцыятыву праваабаронцы. Па выніках разгляду Вікторыя Фёдарава атрымала адказ, у якім сцвярджаецца, што Правілы ўнутранага распарадку прайшлі юрыдычную экспертызу ў Мінюсце, а таксама абавязковы папярэдні кантроль канстытуцыйнасці, які ажыццяўляе Канстытуцыйны суд. На гэтай падставе Палата прадстаўнікоў адмовілася ўнесці яе прапанову ў Канстытуцыйны Суд.

«На прыкладзе гэтага адказу мы бачым нежаданне ўпаўнаважаных суб'ектаў ўносіць у Канстытуцыйны Суд прапановы аб праверцы канстытуцыйнасці нарматыўнага прававога акта і нават ўнікаць у сутнасць праблемы. Калі раней мы сутыкаліся толькі з фармалізмам, то атрыманы адказ з Палаты прадстаўнікоў падымае больш глыбокае пытанне - пра функцыі Канстытуцыйнага суда і магчымасці прымянення на практыцы шэрагу артыкулаў Закона Рэспублікі Беларусь "Аб канстытуцыйным судаводстве". Зыходзячы з пазіцыі Палаты прадстаўнікоў, калі ўсе законы падлягаюць абавязковаму папярэдняму кантролі Канстытуцыйнага суда, то якія-небудзь звароты, звязаныя з неадпаведнасцю Канстытуцыі, не толькі не маюць ніякага сэнсу. Тады паўстае лагічнае пытанне - можа заканадаўцам варта папросту выключыць любыя магчымасці звароту ў Канстытуцыйны Суд любых суб'ектаў? », - лічыць Вікторыя Фёдарава.

Нагадаем, раней праваабаронца Сяргей Усцінаў накіраваў з гэтай самай нагоды зварот напрамую ў Канстытуцыйны Суд.