Не выйшаў нумар недзяржаўнай газэты “Тэлескоп”, якая выдаецца ў Лідзе на беларускай мове (Радыё Свабода).

Друкуецца штотыднёвік у Лідзе, а распаўсюджваецца ў Мастах. У друкарні адмовіліся надрукаваць наклад, не папярэдзіўшы загадзя рэдакцыю.

Паводле словащ рэдактара Язэпа Палубятки, у пятніцу падрыхтаваны нумар завезьлі ў лідзкую друкарню, але ўвечары стала вядома, што наклад не надрукаваны.

(Палубятка: ) “Яны патэлефанавалі заснавальніку газэты Прушковай і сказалі, што дамова несапраўдная, таму не друкавалі накладу. Хоць можна было, згодна з дамовай, папярэдзіць аб гэтым. Тым болей, сем месяцаў газэта выходзіла”.

Згодна з рэдакцыйным пасьведчаньнем, “Тэлескоп” можа распаўсюджвацца па ўсёй Гарадзенскай вобласьці, мае наклад адну тысячу асобнікаў. Газэта за паўгоду прыдбала больш за шэсьцьсот падпісчыкаў. Нумар, які своечасова не надрукавалі, быў трыццаты.