“Крытычная маса”: паляванне на ведзьмаў-3
Традыцыйная роварная паездка “Крытычная маса” 29 красавіка 2016 года
Чарговы роварны заезд велааматараў, вядомы пад назвай “Крытычная маса”, як і ранейшыя акцыі, не застаўся па-за ўвагай сталічных сілавікоў.
24 чэрвеня дзесятак раварыстых сабраліся ў цэнтры горада, а затым скіраваліся да праспекта Пераможцаў па маршруце, на якім 29 красавіка былі затрыманыя некалькі ўдзельнікаў папярэдняга заезду, а ў дачыненні да Зміцера Паліенкі была распачатая крымінальная справа па арт. 364 Крымінальнага кодэкса - "Гвалт або пагроза ўжывання гвалту ў дачыненні да супрацоўніка органаў унутраных спраў". На дадзены момант ён знаходіцца СІЗА-1.
На мосце праз Свіслач актывісты “Крытычнай масы” зладзілі акцыю з інсталяцыяй, расцяжкай і дымавымі фаерамі. Валанцёры-назіральнікі адзначаюць, што супрацоўнікаў міліцыі пры гэтым не заўважалася. Аднак ўвесь час за калонай велааматараў рухаўся аўтобус жоўтага колеру з супрацоўнікамі міліцыі, якія не прадпрымалі ніякіх актыўных дзеянняў.
Тым не менш, на 7 ліпеня ў ДАІ Цэнтральнага раёна Менска былі выкліканыя тры актывістаў ініцыятывы “Пошуг” Дар'я Тылецкая, Павел Сяргей і Вячаслаў Касінераў. Стала вядома, што супраць іх распачатая адміністрацыйная справа па арт.18.23 КаАП ("Парушэнне правілаў дарожнага руху") менавіта за велапрабег 24 чэрвеня.
Абсурднасць гэтых выклікаў палягае ў тым, што падчас правядзення апошняй “Крытычнай масы” 24 чэрвеня ніхто з вышэйназваных актывістаў не прымаў удзелу ў велапрабегу і тым больш не выязджаў на праезную частку. Відаць супрацоўнікі міліцыі, якія назіралі за акцыяй вырашылі перастрахавацца і зрабіць з іх правапарушальнікаў. Толькі на гэта раз, як кажуць, патрапілі пальцам у неба і “паляванне на ведзьмаў” не атрымалася.
29 красавіка 2016 года ў Мінску адбылася першая ў гэтым годзе традыцыйная роварная паездка “Крытычная маса”. Супрацоўнікі міліцыі жорстка затрымалі 6 удзельнікаў акцыі, большасць з якіх атрымалі адміністрацыйнае спагнанне. У дачыненні да Зміцера Паліенкі была распачатая крымінальная справа па арт. 364 Крымінальнага кодэкса - "Гвалт або пагроза ўжывання гвалту ў дачыненні да супрацоўніка органаў унутраных спраў".
