Салігорск: Прадстаўнік БХК абмеркаваў з кіраўніцтвам мясцовага Савета дэпутатаў пытанні правоў чалавека
Прадстаўнік БХК у Салігорску Леанід Мархотка
Рэгіянальны прадстаўнік Беларускага Хельсінкскага Камітэту Леанід Мархотка сустрэўся са старшынёй Салігорскага раённага Савета дэпутатаў Лідзіяй Клішэвіч. На сустрэчы былі абмеркаваны актуальныя праваабарончыя праблемы беларускай сталіцы шахцёраў. У асноўнымі гутарка ішла пра даклад аб дыскрымінацыі беларускамоўных у рэгіёне ды новае рашэнне мясцовых уладаў аб масавых мерапрыемствах.
Па словах Лідзіі Клішэвіч, даклад аб выкананні правоў беларускамоўных грамадзян у рэгіёне ў дадзены момант вывучаецца дэптутамі. Пра вынікі разгляду было паабяцана даць грунтоўны адказ у самы бліжэйшы час. Аднак па пытанні адмены прынятага раённымі ўладамі рашэння “Аб вызначэнні месцаў правядзення масавых мерапрыемстваў” паміж бакамі ўзнікла пэўнае непаразуменне.
- У адпаведнасці з дзеючым заканадаўствам я запатрабаваў прадставіць мне магчымасць прысутнічаць на паседжанні Савета дэпутатаў пры разглядзе маёй прапановы аб адмене неправавога рашэння салігорскага райвыканкаму і разглядзе майго праекта пастановы аб свабодзе мірных сходаў, - кажа Леанід Мархотка. - Мяне ж абвінвавацілі ў палітычнай заангажаванасці напярэдадні прэзідэнцкіх выбараў і заявілі, што на паседжанні прэзідыўма нікога пускаць не будуць. Давялося вяртаць гутарку ў афіцыйна-дзелавое рэчышча і распавядаць пра законнасць маіх патрабаванняў “на пальцах”. У выніку паабяцалі запрасіць мяне на чэрвеньскае паседжанне Савета дэпутатаў.
Агулам праведзеную сустрэчу з кіраўніцтвам дэпутацкага корпусу раёна праваабаронца Беларускага Хельсінксага Камітэту лічыць карыснай. На думку Леаніда Мархоткі, нават такі кволы дыялог з уладамі можа даць станоўчы вынік у канкрэтных пытаннях, датычных правоў чалавека.
