Алесь Бяляцкі сустрэўся са старшынёй Еўрапарламента
Алесь Бяляцкі і Марцін Шульц сустрэліся ў Страсбургу 2 ліпеня 2014 ©Europäisches Union 2014
Беларускі праваабаронца Алесь Бяляцкі і кіраўнік Еўрапарламента Марцін Шульц абмяняліся інфармацыяй пра сітуацыю ў Беларусі.
«Мой сігнал да Шульца быў у тым, каб працягваць намаганні, якія яны прыкладалі цягам усіх гэтых гадоў, пасля снежня 2010-га, у справе вызвалення палітычных зняволеных. А таксама каб яны працягвалі дамагацца комплексных зменаў з правамі чалавека і са станам дэмакратыі ў Беларусі», — паведаміў Алесь Бяляцкі пасля сустрэчы Радыё Свабода.
«Шульц у курсе таго, што адбываецца ў нас. Мне падаецца, гэта добры пачатак працы Еўрапарламента — каб яны не пазбаўлялі Беларусь той увагі, якая была перад гэтым, улічваючы новую сітуацыю ў нашым рэгіёне», — дадаў Бяляцкі.
Раней былы палітвязень, кіраўнік праваабарончага цэнтру «Вясна» і віцэ-прэзідэнт Міжнароднай федэрацыі за правы чалавека Алесь Бяляцкі сустракаўся з еўракамісарам у пытаннях пашырэння і палітыкі добрасуседства Штэфанам Фюле, Генеральным сакратаром Савета Еўропы Турб’ёрнам Ягландам і старшынёй Парламенцкай асамблеі Савета Еўропы Ан Брасер.
Алесь Бяляцкі быў вызвалены 21 чэрвеня паводле амністыі. Праваабаронцу арыштавалі 4 жніўня 2011 году, за кратамі па палітычных матывах ён правёў 1052 дні.
