Нямецкія журналісты і пісьменнікі напісалі Алегу Праляскоўскаму
ПЭН-Цэнтр Германіі, а таксама аўтары, лектары і выдаўцы, уключаючы лаўрэатаў Нобелеўскай прэміі Гюнтэра Граса іЭльфрыду Джэлінэк, сёння накіравалі адкрыты ліст на адрас міністра інфармацыі Беларусі наконт пазбаўлення ліцэнзіі выдаўца Ігара Логвінава.
У лісце яны пратэстуюць супраць такога захаду і патрабуюць тэрміновага аднаўлення дзейнасці выдавецтва.
“Логвінаў з’яўляецца адным з самых значных выдаўцоў у Беларусі, дзе ўвогуле мала незалежных выдавецтваў. Логвінаў цягам апошніх 14-ці гадоў вельмі спрыяў развіццю незалежнай беларускай літаратуры”, – гаворыцца ў паведамленні для прэсы, распаўсюджаным 28 кастрычніка.
Тэкст адкрытага ліста:
“Шаноўны спадар міністр!
ПЭН-Цэнтр Германіі і падпісанты – аўтары, лектары і журналісты – з абурэннем даведаліся, што Ваш урад з надуманых прычын пазбавіў ліцэнзіі выдаўца Ігара Логвінава. Мы расцэньваем Ваш учынак як палітычна матываваны, накіраваны на тое, каб змусіць маўчаць крэатыўнага і вельмі важнага выдаўца. Выдавецтва “Логвінаў” робіць вельмі важны ўнёсак у развіццё беларускай культуры і ў яе прызнанне на міжнародным узроўні.
Выдавецтва “Логвінаў” прадстаўляе стракатую і разнастайную культурную спадчыну Беларусі, яе гісторыю, якая ёсць неад’емнай часткай еўрапейскай традыцыі. Мы адназначна патрабуем перагледзець гэтае несправядлівае скасаванне ліцэнзіі. Мы будзем пільна сачыць за развіццём падзеяў і выказваем поўную салідарнасць без усялякіх абмежаванняў з нашым калегам Ігарам Логвінавым.
Ад імя ПЭН-Цэнтра Германіі
Ёзэф Хаслінгер, прэзідэнт
Саша Фойхерт, віцэ-прэзідэнт
Дармштат, 28.10.2013".
