Крычаў: “Вольны горад” зноў у судзе
Рэдактар незалежнай крычаўскай газеты “Вольны горад” Сяргей Няроўны
На працягу двух дзён 18 і 19 верасня ў судзе Крычаўскага раёна працягваўся разгляд чарговага пазова КУП “Чэрыкаўскага ПМК-280” да газеты “Вольны горад”. Суддзя Антаніна Качанава высвятляла абставіны таго, ці сапраўды журналісты газеты “Вольны горад” у артыкуле “З абвяржэннем пачакаем” дыскрэдытавалі кіраўніцтва прадпрыемства і падрывалі дзелавую рэпутацыю КУП “Чэрыкаўскае ПМК-280”. Гэты артыкул быў змешчаны ў нумары № 25 газеты “Вольны горад” ад 29 чэрвеня 2013 года.
“Разгляд пазову ў судзе 18 верасня працягваўся тры з паловай гадзіны, з 14 да 17-30, - распавядае рэдактар газеты “Вольны горад” Сяргей Няроўны. – Былі апытаныя сведкі, разгледжаны прадстаўленыя паперы. Пасля суддзя Антаніна Качанава перанесла далейшы разгляд на 15-00 19 верасня. Сёння справа ў судзе разглядалася дзесьці гадзіну. Шчыра кажучы, у нас папярэдне складалася ўражанне, што сёння і будзе вынесена рашэнне, прычым яно будзе негатыўным для журналістаў газеты “Вольны горад”.
Аднак суддзя Антаніна Качанава падышла да разгляду справы адказна. Яна запатрабавала ад адміністрацыі КУП “Чэрыкаўскае ПМК-280” прадставіць у суд калектыўныя дамовы работнікаў, іх працоўныя кніжкі, а таксама кнігу рэгістрацыі загадаў па прадпрыемству. Наступнае пасяджэнне суда суддзя прызначыла на 21 кастрычніка, каб адміністрацыя ПМК-280 змагла падрыхтаваць усе неабходныя дакументы”.
Па словах Сяргея Няроўнага, пасля паседжання суда 19 верасня ў яго з’явілася нейкая надзея, што справа будзе разгледжана аб’ектыўна.
Нагадаем, шо паводле пазоўнікаў з адміністрацыі КУП “Чэрыкаўскае ПМК-280”, змешчаныя ў артыкуле “З абвяржэннем пачакаем” звесткі пра тое, што з працаўнікамі Чэрыкаўскай ПМК-280 Байгала і Коневым, якія выступалі сведкамі ў судзе пры разглядзе папярэдняй справы па пазову КУП “Чэрыкаўскае ПМК-280”, не заключаны адпаведным чынам працоўныя кантракты, не адпавядаюць рэчаіснасці. ПМК-280 просіць суд Крычаўскага раёна прызнаць апублікаваныя звесткі не адпавядаючымі рэчаіснасці і абавязаць выдаўца газеты Уладзіміра Кудраўцава і рэдактара Сяргея Няроўнага апублікаваць у “Вольным горадзе” абвяржэнне.
Пазоўнікі прыклалі да пазову тэкст абвяржэння, які павінен быць надрукаваны ў “Вольным горадзе”.
