Віцебскаму незалежнаму журналісту абвешчана папярэджанне

Незалежны журналіст Уладзімір Жыгулоў атрымаў афіцыйнае папярэджанне, падпісанае намеснікам пракурора Віцебскай вобласці Георгіем Каранько. Спадара Жыгулова вінавацяць у працы без акрэдытацыі на замежны сродак масавай інфармацыі – газету "Витебский курьер", зарэгістраваную ў Смаленску.

Пракурор Павел Зайцаў, да якога быў выкліканы незалежны журналіст, збіраўся ўзяць тлумачэнні адносна прэцэдэнту ў абласным псыхіятрычным шпіталі. 21 жніўня Уладзімір Жыгулоў прыехаў туды па запрашэнні галоўнага лекара Алены Мартынавай, якая пагадзілася на інтэрв'ю пра працу гэтай установы і пра стан Ігара Пастнова, змешчанага сюды на прымусовае псіхіятрычнае лячэнне.

Аднак, як  раней, ад  гутаркі з журналістам А.Мартынава адмовілася, спаслаўшыся на занятасць. А намеснік Ігар Свіркуноў, да якога накіравала Уладзіміра Жыгулова, размаўляць з журналістам не стаў увогуле. Ен заявіў, што газета "Витебский курьер", дзе падрабязна выкладаецца гісторыя  Ігара Пастнова,  не зарэгістравана ў Беларусі.

На думку Уладзіміра Жыгулова, менавіта  інтарэс грамадскасці да справы Пастнова стаў падставай для "пільнасці" пракуратуры:

"Мне паказалі некалькі старых газет, за 2011, 2010 гады. Але тады пракуратура маўчала! Цяпер у матэрыялах па маёй справе ёсць рапарт супрацоўнікаў міліцыі і падрабязныя паказанні намесніка галоўнага псіхіятрычнага шпіталя  Ігара Свіркунова. Інтэв'ю з ім, між іншым, так і не адбылося, бо ён не стаў са мной размаўляць. Канешне, яно не было нідзе надрукавана, бо я нічога і не пісаў. Але пракуратура палічыла, што дастаткова факту маёй сустрэчы са Свіркуновым. Увогуле ж газета "Витебский курьер" у друкаваным выглядзе ўжо досыць даўно не выходзіць. Я лічу, што пракуратуры была патрэбная любая фармальная падстава, каб прымусіць мяне "замаўчаць", але я на гэта не паддамся".

Праваабаронца Павел Левінаў, які прысутнічаў у пракуратуры як грамадскі прадстаўнік Жыгулова, звяртае ўвагу на тое, што папярэджанне было падрыхтавана загадзя:

"Жыгулоў адмовіўся даваць тлумачэнні, скарыстаўшыся правам, дадзеным артыкулам 27 Канстытуцыі – што чалавек можа не сведчыць супраць сябе. Але ніякія тлумачэнні пракуратуру не цікавілі: пракурор Павел Зайцаў прыйшоў на гутарку з Жыгуловым з ужо гатовым папярэджаннем. Так што скажы ён нешта ў сваю абарону ці не – гэта нічога б не змяніла…"

Уладзімір Жыгулоў збіраецца абскардзіць папярэджанне пракуратуры. Ен лічыць, што яно вынесена незаконна, і  што нават падчас сустрэчы з пракурорам Зайцавым закон парушаўся. Ужо не кажучы пра парушэнне права кожнага чалавека на атрыманне і распаўсюд інфармацыі, якое парушыла віцебская абласная пракуратура.