Віцебскі абласны суд пацвердзіў, што актывіста Пятра Іванова аштрафавалі законна

Пётр Іваноў спрабаваў абскардзіць пастанову суддзі Першамайскага райсуда Валянціны Кісмярошкінай, якая прысудзіла актывісту штраф нібыта за ілжасведчанне супраць супрацоўнікаў ДАІ і непадпарадкаванне міліцыі. Але абласны суд вырашыў, што пастанова райсуду законная  і адмене не падлягае.

17 красавіка ў Перашамайскім райсудзе Пятра Іванова аштрафавалі двойчы - першы штраф памерам 2 мільёны прысуджаны за тое, што ён, на думку кіраўніцтва ДАІ, выклаў непраўдзівыя факты ў скарзе на парушэнне кіроўцам міліцэйскага аўтамабіля правіл дарожнага руху. Другі штраф – за непадпарадкаванне супрацоўнікам міліцыі, якія гвалтам цягнулі яго ў суд за ілжэсведчанні. Ні ў першым, ні ў другім выпадку  Пётр Іваноў не прызнаў сваёй віны. Ён перакананы, што суддзя Кісмярошкіна судзіла яго з грубымі парушэннямі Працэсуальна-выканаўчага кодэксу,  прасіў абласны суд адмяніць яе рашэнне. Аднак яго цёзка  па прозвішчы,  суддзя абласнога суду Святлана Іванова  пакінула пастанову ў сіле.

Хадайніцтвы Пятра Іванова былі адхілены, нават весці аўдыёзапіс пасяджэння было забаронена. Між тым, менавіта запіс, зроблены падчас працэсу ў райсудзе, Пётр Іваноў прадэманстраваў суддзі ў якасці доказу парушэння з боку суддзі:  на запісе суддзя Кісмярошкіна зачытвае пастанову, дзе гаворыцца, што Пётр Іваноў раней прыцягваўся да адміністрацыйнай адказнасці, а з выпраўленага друкаванага варыянту пастановы вынікае, што да адміністрацыйнай адказнасці ён не прыцягваўся.

Аднак суддзя аблсуду спытала, ці была папярэджана суддзя Кісьмярошкіна пра аўдыёзапіс, хаця асобнага дазволу на гэта, у адрозьненне ад відэаздымак у судовай зале, не патрабуецца. І ўрэшце пастанавіла, што парушэнняў няма, і што скаргу пакідае без задавальнення.