Алесь Бяляцкі Леаніду Судаленку - я знахожуся ў камандзіроўцы, акурат паміж Менскам і Гомелем
Cтаршыня Праваабарончага цэнтру “Вясна”, віцэ-прэзідэнт FIDH Алесь Бяляцкі
Сёння праваабаронца з Гомелю, старшыня Гомельскага аддзялення рэспубліканскага грамадскага аб’яднання “Прававая ініцыятыва” Леанід Судаленка атрымаў ад свайго палітычна зняволенага калегі Алеся Бяляцкага паштоўку, датаваную 2 кастрычніка. Палітвязень выказвае шчырую падзяку за віншаванні, якія былі яму дасланыя з Гомеля ў бабруйскую калонію напярэдадні дня народзінаў.
“Добры дзень шаноўны Леанід! Дзякуй за віншаванне. За мяне дзядзька моцна не хвалюйся. Я і так з вамі. Адзінае, што ў камандзіроўцы, “акурат” паміж Менскам і Гомелем. Трымайцеся там, не апускайце рукі і тады ўсё будзе добра. Да сустрэчы, Алесь”.
Нагадаем, перад 25 вераснем, калі палітвязень святкаваў свой пяцідзесяцігадовы юбілей 50 віншавальных паштовак пайшло на яго адрас з Гомельскага рэгіёну. Гомельскія праваабаронцы, грамадскія ды палітычныя актывісты жадалі палітвязню Алесю у такі складаны для яго час як мага хутчэй выйсці на волю і далучыцца да праваабарончай дзейнасці.
