Брэсцкія ўлады забаранілі пікет за годную працу
Брэсцкі гарвыканкам
З ініцыятывай правядзення акцыі 7 кастрычніка, калі будзе адзначацца Міжнародны дзень барацьбы за годную працу, у гарвыканкам звярнуліся брэсцкія прадстаўнікі прафсаюзу радыёэлектроннай прамысловасці (РЭП). Пры гэтым заяўка была пададзена на правядзенне пікету ў месцы, якое вызначана ўладамі для такіх мэтаў – у парку воінаў-інтэрнацыяналістаў.
Як паведаміла сябра прафсаюзу РЭП Аляксандра Гурына, падчас акцыі планавалася засяродзіць увагу на тым, што Брэсцкая вобласць займае апошняе месца сярод рэгіёнаў Беларусі па памерах сярэдняй заработнай платы, а ў цэлым у краіне адсутнічаюць умовы для годнай працы.
Аднак з Брэсцкага гарвыканкаму атрыманы адмоўны адказ наконт пікету: чыноўнікі спаслаліся на тое, што ў згаданым парку 7 кастрычніка будуць ладзіцца святочныя мерапрыемствы з нагоды Дня настаўніка.
Аляксандра Гурына папярэдзіла, што актывісты незалежнага прафсаюзу маюць намер у бліжэйшую нядзелю прыйсці ў парк воінаў-інтэрнацыяналістаў, каб пераканацца, што там сапраўды будзе свята.
