Праваабаронцы надалі ўніверсальнаму лагатыпу правоў чалавека нацыянальны каларыт
23 верасня 2011 году Генеральнай асамблеяй ААН быў прадстаўлены пераможца сусветнага анлайн-конкурсу “Лагатып правоў чалавека”, на які было даслана 15396 прапановаў удзельнікамі з 190 краінаў. Эмблема “Free as a man” (“Свабодны як чалавек”), прапанаваная сербскім дызайнерам Прэдрагам Стакічам, спалучае ў сабе сілуэты рукі і птушкі і сімвалізуе мірны ўнёсак ва ўмацаванне правоў чалавека, нягледзячы на культурныя і моўныя бар'еры.
Зараз сусветны лагатып міжнароднага руху за правы чалавека вольны ад якіх-небудзь правоў і можа быць выкарыстаны кожным як бясплатны твор «адкрытага доступу» на сайце www.humanrightslogo.net. Акрамя таго, на сайце прадстаўлены розныя варыянты агульнапрынятага сімвалу, сярод якіх і тыя, што адлюстроўваюць прыналежнасць да нейкай краіны.
Праваабарончы цэнтр “Вясна” таксама вырашыў надаць міжнароднаму лагатыпу нацыянальны каларыт і аздобіў руку-птушку выцінанкай – атрымаўся адаптаваны беларускі варыянт сусветнага праваабарончага лагатыпу. Дапамагла ім у гэтым майстар выцінанкі – Вольга Бабурына.
Спадзяемся, наша ініцыятыва будзе падтрымана і іншымі праваабарончымі арганізацыямі краіны і гэты сімвал будзе ўспрымацца як лагатып правоў чалавека Беларусі. Чакаем водгукаў, а, можа, і новых прапановаў.
