Брэст: БХД падала заяўкі на шэсці ў падтрымку палітвязняў

Актывісты незарэгістраванай партыі “Беларуская Хрысціянская дэмакратыя” (БХД) падалі ў Брэсцкі гарвыканкам заяўкі на правядзенне 10 і 14 ліпеня шэсцяў, якія будуць прысвечаны Паўлу Севярынцу (ён адбывае так званую “хімію” ў якасці пакарання) і іншым беларускім палітвязням.

Па словах каардынатара БХД у Брэсце Алеся Чаркашына, мэтай абедзьвюх акцыяў з’яўляецца жаданне прыцягнуць увагу грамадскасці да людзей, якія знаходзяцца пад вартай за свае перакананні. “Гэтыя людзі, нягледзячы на ўсе здзекі, якім яны падвяргаюцца, не пішуць прашэнні аб памілаванні, - адзначыў Чаркашын. - Беларускія ўлады выстаўляюць палітвязняў злачынцамі, ігнаруючы той факт, што міжнародная супольнасць ужо прызнала іх вязнямі сумлення”.

Падчас шэсцяў, акрамя праблемы палітвязняў, ініцыятары гэтых мерапрыемстваў таксама маюць намер закрануць іншыя балючыя для грамадства тэмы, як, напрыклад, сямейныя каштоўнасці і свабоду веравызнання.